Nihin Facebook chungah pa fa an si ṭheo lai, bia an i halnak an video tawite ka hmuh. Zei bantuk dah si hnga tiah ka zoh, khurkhua tampi a ka ruah ter colh. A tawite nakin an biaruahnak ah ka vun kal colh lai.
Pa fa an si le si lo cu ka fiang set lo, si dawh dang cu an si ko. Motor chungah an pahnih te cun thil an ei pah. A pa nih a thli tein Video a rak record i a fapate cu hitihin bia a hal,Zeidah tuah seh na ka duh, Zeitindah um seh ti na ka duh’? tiah bia cu a hal.
A fapa te nih a lehmi cu ‘Thi law kan duh. Zungzal caah thi law kan duh’, tiah fawi zaang ngai cun a leh. A pa cu khuaruah a har i chikhat a dang a khar. A thawh i a ti ṭhanmi cu ‘Thi seh ti na ka duh taktak ko maw? tiah a hal ṭhan.
A fapa nih cun ‘Aw thi law kan duh’ tiah a leh ṭhan. A fapa te nih cun ai thawh riangmang i a peh rihmi cu ‘Namte in nangmah le nangmah i sawhthat ko hme’, tiah a ti chap rih ai.
Chikhat holh loin a fapa cu a zoh. ‘Namte in i sawhning law, ka thi chuak sehlaw na ka bawm lai maw tiah a hei hal? ‘Aih! Kan bawm lai lo kan nih sawh lai’, tiah a ruah lo tukin a fapa nih cun aleh. A pa cu khurkhua ruat in holh kho lo cun an fapa in motor ah cun an ṭhu.
Fale hmurka in a chuakmi bia hi bia sawhsawh a si bal lo. Cun, hmun dang, ka dang in biachim holhrel siseh, ziaza zong hi an i cawn tuk lemlo. Innchungkhurkhar, nu le pa sin hna in i cawn deuh tawn a si.
Fale um lioah nu le va kan i sik tawn i pakhat le khat kan i cakning, kan i tining tehna le kan hmanmi biafang, kan chimmi tete hna hi an thinlung tlap chungah an rak i ṭial hna i cinken tawn hna.
Fale hi sawhsawh le cawnpiak sawhsawh ding an si lo. Lungfim, upa biaruah tein cawnpiak an herh tuk ve. Fale hmaika ah nu le va i sikcak hna hi hman lo a ṭha. Ngakchia, fale khuaruahnak zong a hrawh!.
Fale cawnpiaknak ah, Church School cawnpiaknak le midang cawnpiaknak lawng i rinh loin kanmah nu le pa hrimhrim nih caan pek tein chimh cawnpiaknak zong hi ngei hna usih!
Fale lamding a hmuhsaktu ding kan si ti le, ‘Fale hi Pathian sinin kan hmuhmi hna Rosung lawi, thluachuah a kan pekmi an si ti hi’ philh cio hram hlah usih! Salai Van Lahnin