Salai Robert Biakcin. Executive Editor, The Lairam Times. Lawngtlai pengkomh dirhmun zohnak le Laimi luh ning kong tlawmpal. Lairam Cozah Local Administration Department nih 2020-2021 chung i data a langhter ning ah cun Village Council (VC) 95 a um, Sub Village Council (SVC) hi 7 a um.
Lairam chungah a ummi dihlak milu hi 103,474 a si. Hi chungah nu 52,095 le pa 51,379 an si, Minung 103,474 chungah minung 79,500 hrawng hi Laimi ai si i, a dang cu Bru, Chakma le miphun dang an si hna. Hi minung 103,474 lakah Laifa tlangholh Halkha holh hmangmi hi zatuak ah 18% hrawng an um”.
LADC area ah Lai hrinsor ummi hi Chin State lei in a rak lutmi kan si bik, Lai miphun kan si dih ko. Chin State lei in LADC area i Lai hrinsor a rak lut hmasabik cu Leitak-Marau lei, Lianching, Lianhlawng, Lahnim, Sakhong, Nuhrim, Nutlai, Vuangtu, Thangngen, Lawngsang, Mathipi, Mualhlun, Hlawnceu, Bunghai, Thlaceu, Keiraw, Thianhlun, Ceupa, Sawmhal, Fambawl, etc.
Tlaisun-Falam lei Zahau, Hlawnceu, Tlaisun, Fanai, Sunthla, Shahu, Amlai, Khualring, Seval, Rama, Laitluang, etc. Halkha-Thantlang lei, Cinzah, Zathang, Khenglawt, Hlawnching, Hranglung, Aineh, Chuntei, Bawikhar, Mangpa, Tluangneh, Siakhel, Chiato, etc. Lungzarh-Khuafo lei Fanchun, Hnialum, Mualcin, Zinhlawng, etc.
An lakah Cinzah le Khenglawt zong an i tel, annih hi Thantlang lei in bawi caah an lakmi hna an si. Mindat-Matupi lei, Anri le Ponai an si. Hi kan chimmi chungphun hna hi Lai hrinsor an si dih. Kan rak chuahkehnak khuaram hoih in a phuphu in kan then bia tu a si. LADC minung 50% nih hin Chin hrinsor Zo holh an hman”.
Lai Idol Rebek Lallawmzuali Sining Tlawmpal Cuanhnak. Lai Idol Rebek Lallawmzuali cu, Pu F. Laldinthara Fanai le Pi Lalpianfeli Zathang hna i an fanu a si. Tang 12 a dih i, Computer DCA a dihmi a si, Lunglei ah khuasa a si, hlasak i zuam dingin August thla donghnak lei ah Lawngtlai khua a phan, November 29 ah Lawngtlai khua a chuahtak.
Rebek Lallawmzuali hi Lai khuapi tiah kan i uangthlar ngaimi Lawngtlai khua ah hin thla 3 hrawnghrang lawng a ummi a si. Hi thla 3 hrawng a um ah hin Lai hlasak lawng a silo, Laiholh a holh kho, Laica a țial kho upat a um tuk hringhran.
Lai Idol Rebek Lallawmzuali Le Lawngtlai Mizapi Cuaithlainak. Fanai le Zathang chungphun i an fanu, Zathang cu kan hngalh cio bantukin an pupa chan ah Laitlang khualipi Hakha khua i a bawimi le Hakha peng khua tampi uktu an si.
A cunglei i kan langhter cang bantukin Fanai phun hi Falam lei in Lawngtlai pengchung ah a lut hmasa an si, Falam peng Fanai hna nih cun Lai ah aa chiami an si ( Chin hmanh hi an cohlan deuh ti awk lei in), Asinain Mizoram ah cun Lai ah an i chia lo zong a si kho men ko. Asinain an chuahkehnak zoh tikah Lai miphun bak an si ti kha hmasabik ah chim ka duhmi a si.
Lai Idol Rebek Lallawmzuali cu Lawngtlai ah thla 3 hrawng lawng a um kan ti cang kha. Hi thla 3 chung ah hin Laiholh, Laica, a khek bak lo mi nih, duh tawk in a holh khawh le a țial khawh hi, khuaruah har ngai a si ko, Lawngtlai Laimi kan caah cun, zei ruangah khuaruahhar kan ti khawh?
Lai cozah ah pension tiang rianțuanmi, kum 30 chung rianțuanmi, Lai biaknak ah pension tiang rianțuanmi, kum 20 chung rianțuanmi, kum 15 chung rianțuanmi, kum 10 chung rianțuanmi hna nih Laiholh i holh cu chim lo, Laiholh in kan in chawnh hna ah a sullam hmanh nan hngalh lo hi khuaruah har le, ningzak taktak khi nan si.
A min in Lai nan i ti ngam, Lai cozah nih hlawh an in pek hna, Lai biaknak ah rian nan țuan, Laifa, Laiholh a hmangmi cheuhra cheukhat, thawhlawm a ei mi hna zei ti’n Lai miphun le Lai fa mithmai nan zoh ngam, i tuak ngai ngai a hau.
Lai ah thihnun a ngamh mi hna, sining le caan vialte pek in Lai miphun caah rianțuanmi hna, na miphun holh na thiam lo mi le na țial khawh lo mi, na chim khawh lo mi hi, na caan pek in suingun chawva dih in na țuanmi Lai miphun hi zei ti’n a hmai na khah.
Lai khualipi ah khua ka sa tiah aa uangthlar ngaimi Lawngtlai pengchung Laimi hna, kum 50, kum 60, kum 70, kum 80, kum 90, kum 5, kum 10, kum 15 khuasak cangmi hna nih Laiholh le Laica nan țial khawh lo le nan holh khawh lo lio ah, thla 3 te lawng Lai khualipi ah a rak ummi nu cu Laiholh in a holh kho, Laica in ca a țial khawhmi na hmuh ah khin cawn duhnak lungthin na ngei kho ve ko lo maw? upat duhnak lungthin na ngei ve ko lo maw? hi bantukin thiam duhnak lungthin, cawn duhnak lungthin na ngeih lo ah cun Lai miphun, Laifa, Lainu, Laipa tiah kan i chim ngam awk a si lai lo.
Lai cozah kan ngei tiah aa uangthlar tukmi hna, Lai cozah hi, Laifa, holh le ca nunphung ram a ngeimi Lai miphun kan si ruangah kan ngeihmi a si ti nan i fian ko bu ah, Laiholh, Laica nan i thiam ter duh lo mi hi ningzah hngal cang uh.
Thla 3 chung ah Laiholh a holh kho i Laica a țial kho mi Lai Idol Rebek Lallawmzuali upatnak kan pek, na nun hi Lawngtlai Laimi kan caah cawn awktlak ngai ngaimi a si. Hmailei na lamthluan ah Laiholh, Laica dirpitu le, Mizoram Lai hrinfa vialte le vulei cung Laimi pehtlaihnak tha sertu si hram seh.
Zohchihmi;
LADC milu cuanhnak – Salai R Lahnim
Lai Idol Rebek Lallawmzuali Interview