Zofate hi chhan hrang hrang avangin inpumkhat loh chang awm ṭhin mah se, kan inpumkhat hi a ṭulin a ṭul tih kan thil tawnin a tilang mêk zel.
Hnam dangte zawk hian unau leh thlah khat, thisen zawmpui kan nih hi an hai lo. Tunah pawh min duh loh dan a thuhmun a, hnawk min tih dan a inang tlâng vek a, keini lam hi chuan inpumkhat bâk hi tih tur dang kan nei lo – kan tihsual awm hauh loah Zofa kan nih vang ringawtin kan tuar mêk a nih hi.
Keini kan inlungrual hleihtheih loh laiin kan chhehvel hnamte zawk hian inang rengin min hmù tih a lang chiang a, a chi mal te te angin hnawk min ti a ni lo a, kan zavai mai hian, tunah tak hi chuan, Zofate zawng hi min vai hma a nih mêk hi.
He harsatna hian kan inunauna tichak zual se, kan inmamawh tawnna piah lamah pawh hian lungrualna hi nunpui tlat ila, inṭhen darh tham kan awm lo e.
Kohhran, political party, pian leh murna, awmna State, awmna ram leh ṭawng hman inan loh vang mai maiin inmihran lo ila, tunah pawh Zofate a ni min bitum mêk ni – a chi bing te tein min bei lo a, min vaihma vek a, Zofa nih hi kut tuar phahna tling a ni mêk.
Kan unaute thil tawn hi a na vawng vawng a, putar pakhat kut an thlak video te, Pathian kan biakna hmun ber kang chhe lai thlalakte, a taka ka phone call dâwn ṭhin ngeite aṭang ringawt pawh hian Zofa kan nih avang ringawta min beihna hi a nâ a ni!
Hetiang buaina hi chuan reh hun a la nei ngei ang a, tuna kan manganlaia kan inunauna erawhin reh hun nei tawh suh se. Amah Captain LZ Sailo khan, “Unau te u, in damtlang alawm maw? Rinawmna chibai in dawng thei em?
Chhinlung chhungkhat Zoram leh a chhevel a mi te; Insuihkhawm leh zai i rel ang u,” tiin kan dam leh dam loh thu min lo zawt tawh. Tunah hi chuan kan damlo a, kan damlo tlâng a, kan na tlâng a, chu chuan min suihkhawm mêk chu a nih hi. Zofate Pathian biak hian ro A rel a, kan heti reng bîk hauh lo ang.