Buai caan a phan rih lomi, Flag kong ah upa le bochanmi nan buai lengmangmi hi ka khuaruah a har pah ngai. Zei thil paoh hi season le caan an ngei i, amah le a caan a phak tikah ceih le buaipi hi a tthabik cu a si. A caan lopi ah buai le ceih hi rawhralnak lehlam kan ichap.
Chin National Flag cu, legal issue, Cozah legislation tang ah ceih dingmi thil a si i, hmailei kan ram a tthat tikah, Chin Cozah, Legislation nih an chuahpi te lai i, an chuahpimi Flags chung in, Mipi duhthimhnak, referendum an tuah te lai i, vote tambik a hmumi Flag paoh kha Chin National Flag timi cu a si te hnga. Mahbantuk Chin National Flag kong ceih le debate caan a phak tikah, buai te dingmi thil a si.
A ring/ Green color hi current Chin State flag a si i, 1975? lio Chin State Cozah nih Chin State Flag caah an rak sermi a si. Design a suaitu/ sertu hi tleihcia Dr. Tam Aung Ling a si. Tulio Myanmar ram dirhmun le Chin State a dirhmun cun, dotla Flag aiawh ah ruah khawh a si ve ko lai. Zeicatiah, Chin State uktu nih an rak ser vemi a si ko caah! Nain Referendum lak in nuntermi cu a si lo tikah, dotla ahcun pawm a har thiam.
Pakhat deuh hi CNF flag a si i, Chin National Flag caah hmang usih tiah Chin National Flag tiah min an pek. Chin National Flag tiah min an pek ruang ah Dotla Chin National Flag a si tinak a si lo. Dotla/ Legal, Chin National Flag a si khawhnak ding ahcun, Chin Cozah Legislation nih an chuahpi te lai i, Mipi vote, Referendum an lak tikah, teitu a si ahcun, cu tikah Chin National Flag ti ding khi a va si te hnga.
Nihin, Chin National Flag tiah dotla kan ngei rih lo nain, tulio ahhin Flags tampi hman awk le taar awk um. CNF flag, Chin State Flag, CDF flags etc. tam pi um. Taar awk ah aa tlak tiah ruahmi paoh itaar ko seh. Nain Chin National Flag caah politics khel caan cu a si rih lo.
Chin miphun le Chin ram caah a nunnak thap in dothlennak a tuah cuahmahmi hna hi Chin miphun nih kan in philh hna lai lo. Teinak salu nan tlunpi tik le mahte in iuknak, Chin Cozah a dir khawh tik caan ahcun, nihin ah nunnak a thapmi le a liammi vialte nan thanthar/ Flag hi Chin National Flag ah fawite in mipi nih kan cohlang lai i, kan hman te lai ko tiah kei nihcun ka ruah ko.Zasang Cinzah