Hriamtlai pahnih karlak ah nawlngeihnak i cuh in kahdohnak a chuahnak hmun Suden ram ngakṭah cawmnak hmun pakhat cu an i hren caah ngakchia 60 leng an nunnak a liam, tiah theih a si.
Suden ram khualipi, Khartoum khuapi cu Suden ralkap le a thazaang ṭhawng ngaimi herhsual pingpang caah ti in ralkap an chiahmi hna (Reserve Force) karlak ah kahdohnak faak ngai in a chuahnak hmun pakhat a si caah Khartoum ah ummi ngakṭah cawmnak hmun pakhat ah ngakcghia chuakka hna le kum tlinglo ngakchia hna cu ei-din awk an ngeih ti lo caah a tubantuk in an nunnak a liam hi a si, tiah ngakṭah cawmnak hmun i ṭuanvo ngeitu pakhat nih a chim.
A luancia zarh khat nihnih chung lawng ah ngakchia 26 a bu in an nunnak a liam, tiah anmah he neihniam pakhat nih AFP thawngthanhnak ah a chim. Nunnak a liammi hna lak ah thla 3 tluk ngakchia hna zong an i tel, tiah ngakṭah zohkhennak hmun i rianṭuantu hna cazin ah an langhter. Cu pin ah ngakchia hna nunnak liammi hna i an ruak cu puan raang in an zual hna i phum an timh lio hnanak Vdeo zong hmuhchih a si.
Kahdohnak ruang ah ngakṭah cawmnak hmun ah a herhmi ei-din ding le lam zong an rawk dih caah atu bantuk in ngakchia hna a bu bu in an nunnak a liam hi a si, Cu pinah a chung i rianṭuantu hna zong an zaam dih caah harsatnak tampi kan tong, tiah ngakṭah cawmnak hmun a bawmchantu hna Afkar Omar Mustafa nih a chim.
Atu bantuk in kan ton te lei ti in Khartoum i kahdohnak a chuah thok in kan rak ruah ciami a si ko, tiah a chimchap. Atu hi Khartoum ah kahdohnak ngawl ding in ceihhmainak kan ngei lai ti ah thla 2 chung deng an i zuam nain san a tlai hlei lo caah kahdohnak faak deuh in a zual chin khomi a si, tiah ngiathlaitu hna nih an zumhnak zong an chim chih. Lungmili Post