SAC ralbawizik Min Aung Hlaing cu Myingyan peng a um lio ah Myingyan SAC ralkap hna cu drone in bomb kan thlakhnawh hna i 7 an thi, tiah Myingyan pengkomh Battalion 4 Natogyi PDF in ṭuanvo ngeitu pakhat nih a chim.
May 31 zing suimilam 11:45 ah Min Aung Hlaing le a changtu Soe Win cu Myingyan um Thanmanih sehzung zoh ding in, Khah Mah Yah Battalion chung ah Helicopter in an ṭum. Min Aung Hlaing cu Khah Mah Yah 15 Battalion chung a um lio ah bomb lung 4 in kan thlakhnawh i SAC ralkap 7 an thi i, 8 hliamhma an pu, tiah ṭuanvo ngeitu nih cun a chim.
“Mandalay in a luancia ni thum li hrawng ah SAC ralkap pawl cu an lutchuak ngaingai cang. Natogyi-Myingyan, Myingyan-Taungthar, Myingyan-Bagan-Nyaung U lem le Myingyan- Myothar lam cu an kham dih. Drone in bomb kan thlak hnu ah Min Aung Hlaing nih Battalion Commander pa cu a hmai ah a bengh i Helicopter in a kir,” tiah Myingyan Battalion 4 in ṭuanvo ngeitu pa nih cun a chim.
Cu pinah Pauk peng, Chaungna khua in a chuakmi SAC ralkap le PDF hna cu Chaungna khua nichuahlei ah an i kap i, SAC ralkap le pyusawhti 8 nak tlawm lo an thi, tiah theih a si.
May 30 ah SAC ralkap le pyusawhri nih, Chaungna khua cu an khangh caah inn 100 hrawng a ciam. SAC ralkap le pyusawhti nih Thitchukone khua pawng in hriamngan le hriamhme an kah, tiah Myaing peng mipi rungvengtu hna sinin theih a si.
Cu pinah May 31 ah SAC ralkap pawl cu Yelay Gitkhe khua pawng ah bomb lung 3 in kan puahhnawh hna i a thimi an tam kho. Nihin June 1 ah SAC ralkap le pyusawhti 50 hrawng nih Taraphi khua cu an khangh, tiah Myaing peng mizapi rungvengtu nih an langhter. TCP