Singapore ah sinum rian a tuan cuahmah tu Nu Lia Nian Khawm Zo kum 25 cu a luancia March 8 ah khan incung in a tlak caah a nunnak a liam tiah theih a si.
Lia Nian Khawm Zo cu Chin ramkulh Tedim peng Valvum khua mi Pu Gen Za Cin le Pi Vung Go Cing hna an fanu a si. A thih nak kong he pehtlai in Singapore palik nih dothlat nak an tuah cuahmah tiah theih a si.
“A um nak inn cu dot 6 a si.palik pawl nih dothlatnak an tuah cuahmah,a mah hi Singapore a phak nak a sau rih lo.Myanmar lei ah a ruak kan kuat lo nak cu a nu le a pa le zong ralzam dir hmun in an um caah a si.
A vutcam tu cu a phor kho ding an um ah cun timhcia in kan chiah ko” tiah a ruak thlahnak ah a kal ve mi pakhat nih Zalen ah a chim.Lia Nian Khawm Zo ruak cu March 12 zanlei slm 7:30 tluk ah Singapore ah an khangh i an vui tiah theih a si.
A luancia 2016 lio zong ah khan Singapore ram ah sinum rian a rak tuan mi Chin nu Piang Ngaih Don kum 24 cu a umnak inn ngeitu nih a phunphun in an rak hrem caah a nunnak a rak liam i Singapore biaceihzung nih cu thil a tuah tu le thazang a pe tu tarnu pakhat hna cu kum sau thong an rak thlak hna.CBN Daily News