ko lo hme maw ka ti tawn. Kanmah bon le kanmah kel hon tiawk ngaingai cu a si thlu lai lo nain, van le vawlei in kan i dang ko hon tiawk ngaingai zongah a si thlu ve hlei rua lai lo dah.

RTC timi cu a cozah nih a ngeihmi thil phorhnak mawṭaw min a si. Mawṭaw dang a rak um lo caah ahopaoh nih khualtlawn tikah kan rak i cit tawn. RTC an ti hlanah RTB an rak ti hmasa. A hnuah RTC an ti ṭhan. RTC ciocio hmanhah lutawi le lusau in an um i, kanmah hna tlanval lio RTC hi lutawi pawl an rak si. An zungpi umnak cu atu Kalaymyoh khi a si.

Kalaymyoh in Laitlang ah: Laitlang voikhat an kai ah a tlawm bik RTC paruk hrawngin an rak i zul tawn. Mawṭaw hmaiah thantaar fate an thlai dih hna i, artlang in an rak kai tawn. Khua luh lai paoh ah an muko cio an tum tawn hna i, “RTC a phan“ kan rak ti tawn ve. Kalaymyoh in Lumbang ah an riak.

Lumbang in Hakha ah an riak ṭhan. Hakha in Thlantlang a langin an va kal i Falam ah an riak. Falam in Kalaymyoh an kir ṭhan tawn. Culio i a rak laar ngaimi bia pakhat cu, Kawlholh in “khit hmi tu ṭaing Lumbang hma eih yah mi“ ti a rak si. Keimah zong voithum li ka rak riak bal ve.

Laitlang in Kalaymyoh ah: Kalaymyoh in Laitlang a kaimi cu thil an phorh caah aa citmi kan tha a dam deuh ving. An thil rih si, cho kai a si fawn tikah duhsah tein an kai i minung kan re a thei tuk lem lo.

Laitlang in Kalymyoh a ṭummi belte cu a minung lawng bak an kan phorh cang i, chuk zuan in zuan a si fawn tikah chuklei a kan thui chel, cholei a kan thui chel a si ve. Thantlang in kan i cit i, Kalaymyoh kan va phanh khi cu kan lung a fim huaha tawn lo. Vate chaih hrulhmi kan lo dih tawn.

RTC in khualtlawn cu: RTC aa citmi pawl hi a phun kan tling ve. Mirum an um. Lothlo an um. Cozah rianṭuan kan um. Tarnu tarpa an um. Nungak tlangval an um. Ngakchia an um. Pastor an um. Kawl phungki an um. Cu chungah paiper aa beimi kan um ve. Sei a phorhmi kan um rih. Arbawm a phorhmi zong kan um hoi.

Vok fate a phorhmi hmanh kan um. Thingkuang a phorhmi hna kan um rih. Mawṭaw nih chuk le cho in a kan thui, a kan hlonh, a kan nawk. A kan pahmi an um. A kan nenhmi an um. Cu lakah a luak a luakmi zong kan um. Zu rim a si, kuak rim a si, tikor rim a si hoi, vawlei khu a si fawn i, atulio dohthlen bantuk cio khi kan si ve tawn. A zeiti tiawk kan ṭha lo.

Mawṭaw a mah kal in a kal ve. Aa citmi pawl kanmah siarem ning paoh in kan ṭang lulh cio ve. Nulepa ti zong a um lo. Nule ngakchia ti zong a um lo. Pastor le nustor zong a um lo. Mi ngandam le mi ngandam lo zong a um lo. Mah le siarem ning paoh in um a si nain, aho sia hmanh a rem hlei ve lo.

Mawṭaw hmailei(a mongtu pa pawng) a ṭhu khomi pawl hi a pakhatnak ah nungak lule deuh lawngte an si. A pahnihnak ah Kawl phungki pawl an si fawn. A pathumnak ah mirum deuh le thil ti kho deuh an si ve. An i uah chachuah. Anmah lawng minung ah an i ruah chapbai cio rih.

Kanmah bon le kanmah kel: Atu cu RTC kan i cit ti ṭung lo, kanmah monghmi mawṭaw pei kan i cit leh cang cu kan ti khawh. A si ko, a hmaan fawn ko. Khual kan tlawn lio lebang cu ahopaoh nih meikhu a chuakmi vanlawng i cit cio a si ko. Asinain sihmanhsehlaw, Facebook le Online chungin miphun kan dawt cioning le fim kan i cuh tuk cioning hi kanmah hna chan lio RTC i cit bantuk hlikhlek te kan si ve ko. Ralkap cozah nih minung thluak le minung thinlung an kan hrawh khawhning hi!

Bia cu chim phung a si ko. Ca zong ṭial phung a si ve ko. Nain, a hmun le a hma cu a um ve hnga ta. A caan le a thlihran zong nih a ngeih ve fawn hnga. Interview tuah te hna, “debate“ tuah te hna le “zoom“ in biaruah te hna chinchin cu. Perhkalh Thawng

By admin

Leave a Reply

Your email address will not be published. Required fields are marked *