Shan ram chaklei, Laukkai khua pawng ah a um mi Lay-myat-hna pura ah hmunhma a khuar mi ralkap sakhaan cu MNDAA nih an lak khawh i ralkap 11 a nung in an tlaih hna tiah MNDAA sin in thawng theih a si.
December 3 zinglei sml 6:30am hrawng thawk in Lay-myat-hna pura tlang sakhaan cu hriamngan in an kah hmasa i sml 11:30pm tiang hrawng sml 5 chung hriamngan in an kah hmasa hnu ah MNDAA lei kekal ralkap pawl nih an kah hna i chun sml 12:22pm in zaanlei sml 3:28 chung ah sakhaan No. 1, No. 2, No. 3 hna an lak khawh.
Cun MNDAA lei nih ni 2 chung kahdohnak fak an tuah i December 5 zinglei sml 9:00am hrawng ah ralkap sakhaan No. 4 cu an lak khawh i kahdohnak chung ah ralkap 11 a nung in an tlaih khawh hna i cu chung ah hliam a tuar mi kum upa ralkap pawl zong an i tel tiah theih a si.
Cu Lay-myat-hna pura tlang sakhaan an lak hnu in Laukkai khua thlanglei ah ralkap nih hmunhma an khuarnak High Point pawl a um ti lo, Kokang hmunhma ah Mi-shin-kauk, Nan-htin-ming, Yan-lung-gyai le Ta-shwe-htan ralkap sakhaan pawl lawng a tang cang i Kokang hmunhma ah mah tein khuakhan lairwenak nawl a um kho cang lai tiah MNDAA nih a thanh. The Chinland Post