Tu lio, kan miphun ca i Thlacampiaktu ding cemcem tiah ruahmi hna nih; hi tluk i a ngan a faak cangmi Chin ram um mipi intuarnak chap chin awkah, “Nawl nan ngai lo, tangka nan i bochan,” tiin, sual bia an kan ceih i harsatnak tam chinchin in awkah bia an chim/phuan hi, ka lung a faak taktak! KHRIH in a si lo caah, kan BAWIPA JESUH KHRIH MIN in faakpiin ka doh!
Ni 40 rawl a ul mi an si maw? Kan si ve! THIANG THLARAU he hawikomhnak an ngei maw? Kan ngei ve! BAWIPA nih a chawn hna maw? A kan chawnh ve! Langhnak an hmu maw? Kan hmu ve! BAWIPA an daw bik maw?
Kan dawt bik ve! Bible an rel maw? kan rel ve! BAWI JESUH caah thih an ngamh maw? Kan ngamh ve! BAWIPA JESUH an hmu maw? Kan hmuh ve! Nunnak/Teinak Suiluchin an i ruahchan maw? Kan i ruahchan ve.
Teinak nun an ngeihmi le Bible rel nun an ngeihmi le Thlacam nun an ngeihmi le THIANG THLARAU nih a hawikomh hna i a chawnh hna le PATHIAN nih a zaangfah hna ruang i a rianțuantu ah a thim hnanak cu an i uangthlar tuk hringhrang i, “Nawl nan ngai lo,” tiin, anmah bantukin PATHIAN Vel le Zaangfahnak nih a phak rih lomi zumtu dang sualphawt le biaceih kha an țhawn ling te a si.
Ramleng ummi hi an si khun! Anmah bantukin, midang nih PATHIAN Vel le Zaangfahnak hmu cio hna seh law, mi hi an fel cio ko hnga dah kaw!
PATHIAN thin a hun tertu Israel miphun caah, Moses nih ni 40 rawl ulh in nawlnak ca thla a campiak hna. Samuel nih a palh cuahmahmi Israel caah Thla a campiak hna! Daniel le Nehemiah nih an miphun caah sual phuanin Thla an cam.
Sual ngaichih a thiam lomi mi sual hna kha THIANG THLARAU thawngin sual an i ngaihchih khawhnak hnga caah JESUH KHRIH nih a NUNNAK a pek i a THISEN in Nawlnak a kan tuah piak!
Moses, Samuel, Daniel le Nehemiah hna nih khan, KHRIH THISEN i bochan ding an ngei lo. Kannih cu kan miphun sualnak le palhnak nawlnak caah BAWIPA JESUH MESSIAH THISEN i put, i bochan ding kan ngeih!!!
Chin/Lai miphun hi khuachia nih a doh caah a cei ngaingai ko! Hihi BAWIPA nih a hmuh i luatter a duh! Khuachia nih faak chinchin in doh seh law, harsatnak faak chinchin nih tlak seh tiah a sualnak ka hngalhmi khan sual ka phaw lai lo.
Khuachia tu tei a si khawhnak hnga JESUH KHRIH THISEN Bochanin PA sinah nawlnaktu ka tuah lengmang ko lai. Zeicahtiah, BAWIPA JESUH cu vawlei biaceih (sual phawt) awkah si loin, vawlei (Chin/Lai/kawl miphun) khamhtu si awkah a ra (Johan 3:17).
Ka chung a nung mi cu KHRIH a si caah, Khuachia nih a țhuatmi hna khamh awkah, kan BAWIPA JESUH bantukin nawlnak tu ka tuah lengmang ko lai i PATHIAN Vel le Zaangfahnak thawngin teinak le THIANG THLARAU cu kan hmuh hrimhrim ko lai. Crd: Tluang Lian