Hlasak zuamnak hi hlasak lei thancho a duhmi Lai mino hna caah a cunglei par tiang an phak khawhnak hnga a bawmtu hlei platform tha bik a si ve tiah ka ruah. Hi ruang ah Chin Idol, American Chin Got Talent le hlasak zuamnak tampi ah bawmhnak zong ka rak tuah tawn.
Atu cu ram chung ah hlasak zuamnak pipa kan tuah khawh lonak kum 6 leng a vun si cang, hlasak a duhmi mino lam an tlau caan a sau tiah ka ruah caah atu bantuk in keimah pumpak nih tuanvo lak ding biachahnak ka tuah hi a si.
Phaisa a dih ding budget ka suaimi hi a tlawm bik ting 500 a si. Phaisa a dih lawng si lo, thlali hrawng caan pek a hau, re a thei lai i thluak a ba tuk fawn lai.
Ram a buai hlan miphun thanchonak caah phaisa pia khat zong a tho bal lomi hmurka in soiselnak le dohnak zong a um pah te lai. Hi vialte tuaktan cia dih buin miphun caah a thahnem ko lai ka zumh caah ‘Chin STAR’ ka thawk hi a si.
I tel a duhmi nih Laihla(Hakha le Falam lawnglawng) fungkhat nan sakmi video record kha Chin STAR Facebook page or Viber 09771913564 ah kuat ding a si lai. July thla dih tiang lawng cohlan a si lai.
August thla chung ah top 30 thim a si lai, Septermber ah top 20, October ah top 10 thim an si te lai. Top 10 a lutmi vialte cu November ah Yangon ah auh dih a si lai November dongh lei le December ah stage cung i zuamnak tuah a si te lai.
Laksawng hi pakhatnak caah ting zakhat a si, pahnihnak cu ting 20, pathumnak ting 10 a si lai. Top 20 ah a tlami vialte 20,000 cio, top 10 ah a tlami 50,000 cio, top 10 hnu a tlami 100,000 cio laksawng pek a si lai.
Top 10 a lutmi poahpoah cu Yangon ratnak vanlawng man tiang tawlrel piak dih a si lai. Yangon um chung vialte umnak, einak le ngandamnak lei vialte tuanvo lak dih a si lai. Umnak hi swimming pool ai telmi hotel asilole Star City Condo ah a si te lai.
Main judge ah Laimi nih hla lei kan bochan bikmi Saya Hniang Ceu Ling le Saya Sang Khuai Thang an si lai. Min ngei judge dang zong kan chawnh biak pah cang hna, caan ai relrem ning in an kan bawm ve te lai.Salai Lungthli Tum. Yangon
Share a tuahtu caah phone bill mee poh a um lai, hi cabia a share i Chin STAR page like a tuah mi minung 20 cu phone bill 10,000 cio rawn piak a si lai.