( Mikah 7:7 ) + ( Kolose 3:1-2 ). 7. Sihmanhsehlaw kei cu { Bawipa } kha ka zoh lai, Ka khamhtu Pathian cu ka hngah lai, Ka Pathian nih cun a ka theih lai.
( Kolose 3:1-2 )
1.Nannih cu Khrih sinah nunnak ah thawh nan si cang. Cucaah Pathian orhlei kam i Khrih nih a bawi ṭhutdan cung i a ṭhutnak vancung khua chung i a ummi thil tu kha nan lung in i seh chih hna u.
2.Hi vawlei cung thil hi si loin khika thil tu kha ruat hna u.
A biathiang kan rel mi Bawipa nih kan dihlak caah a thar tein thluachuahnaak kan pek piak ko seh!
Pathian nih thlua a chuah cia mi Cathiang kan relmi a thar in kan dihlak caah thluachuah kan pek piak ko seh, Amen!Kan khual tlawn naak le, kan khuasak naak vawlei cung ahhin, Pathian duhmi a si lomi, vawlei thil hi hmuh ding le zoh ding tampi an um i, Pathian nih a sermi thil cu si dih ko hna hmanh seh law, cu thil hna hmang cun Sehtan nih kan nun hi tluukrilh ter ai zuam peng i, sual naak a phunphun hmangin nifatin in a kan lemsawi peng i,
Cu bantuk in Sehtan lemsawi naak Vawlei thil hna cu zumtu kan mit nih a hmuh tikah caan tampi cu kan thinglung le, kan ruahnaak cu a buai ter i, Cu caah Pathian duhlo mi, Pathian huat mi thil tuah duhnaak le, thil tthalo tuah ah raaltthat naak cu kan thinlung chung ah a um ttheu tawn i Cu bantuk in Pathian lei, vaan lei zoh loin Vawlei thil lawng kan zoh ruangah, zumtu tampi cu kan thinlung a vaivuan i, a donghnaak ahcun Lungdongh naak, harsatnaak le, awlokchawng vaan saan naak nih kan innchungkhar le Khrihfabu ah a kan phanh ttheu tawn!
Mikah 7:7 kan rel mi hi, Israel mi hna le Judah mi hna nih, Bawipa cu zei ah an rel ti lo i, an mah tein an i serchawm mi milem kha an biak hna i, pa le fa, nu le fa karlak zongah i upatnaak, i dawtnaak, i ttihzahnaak pakhat hmanh an lak ah a um kho ti lo i, Cu caah profet Mikah nih cun Vawlei thil , Sehtan pa duhmi thil vialte cu kal taak dingin le, Bawipa lawng lawng zoh ding in le, a mah ah zaa ah zaa ah an thinlung i hngatchan dingin a chimh mi hna bia a si.
Kolose 3:12 kan rel mi hi, Kolose khuami Khrihfabu hna sinah Paul nih ca a kuat mi hna a si. Kolose khua khrihfabu hi Paul nih a dirhmi cu a si lo nain, Paul nin rianttuan tu ding a thlahmi hna nih an va dirhmi a si caah, Paul nih hin kolose khrihfabu hna sinah hin siaherhnaak a ngeih caah hi ca hi a kuat mi hna a si.
Kolose khrihfabu ahcun cawnpiak tu diklo, cawnpiaktu deu hna nih an zumhnaak an hrawh hna i, lam an pial ter dih hna caah Paul nih hin nan nih an khamhtu hna cu Jesuh lawnglawng a si i, thil dang zoh loin an khamhtu hna Jesuh lawng kha zoh peng u law, nan lak i cawnpiaktu deu pawl nih an chim mi kha rak zum lo ding in raalrin a pek mi hna bia a si.
Jesuh Khrih a zumtu kan nih cu vawlei cung hin Vaanram lei panh in a kal cuahmah lio mi kan si hna i, Cu caah Kan zumhnaak a tthan tertu le, kan caah ready tein a um peng mi kan Pathian lei zoh hi kan caah a biapi tuk mi thil a si i, Cu cu Bawipa Pathian nih kan dihlak ca hrangah a duhmi thil zong a si. Pathian lei zoh loin Vawlei thil lawngte zoh naak nih a chuahpi mi a theipaar a khaat ning cu a tanglei ah kan rak langhter hna lai!
Baibal chung ah a biapi tuk mi kan hmuh mi cu , Bawipa Jesuh nih khan (minung 5000) rawl a dangh hna hnu ahkhan a zultu hna cu an khual tlawn naak tilawng chungah rak kal chung ding in nawl a pek hna i, a mah tu cu tlang lei panhin thlacam dingin a kal ve. Cu ti tlang cung i Jesuh thla a cam lio ahcun, a zultu hna cu tilet le thlichia lakah thinphang thathir in an lawng chung ahcun lungrethei ngai in an rak um hna.
Zing Khuadei lai te ah Jesuh cu a zultu hna umnaak lei panh in tii cung ahcun a ke in a kal i, a zultu hna nih, cu ti Jesuh khrih ti cungah an mah lei panh in a ke in a rak rat cuahmah lio cu an hmuh caah an thin a phaang tuk i, an zulh mi Jesuh cu Muithla ah an rak rel. A si nain jesuh nih cun a zultu hna cu nan thin phaang hlah uh, keimah ka si ko ee tiah a hei chimh hna i, Peter nih cun kan zulhmi jesuh khrih na si ahcun ti cung hin nangmah sin rak rat awk ah nawl rak ka pe ve tuah tiah a ti.
Jesuh nih cun na duh ahcun rak raa ko a ti caah Peter cu Jesuh lei panh in ti cung ahcun a ke in a va kal ve tatak. A si nain nawl a pe tu jesuh a zoh chung cu tii cungah cun a ke in a kal kho ve tatak ko nain, Jesuh sin a phanh hlaan ah Peter nihcun Jesuh kha zoh ti loin thilchia le tilet ttih a nung tuk mi cu a zoh caah a thin a phaang i ttihphaan buin tii chung ahcun a pil duahmah. Cu caah peter nih cun jesuh cu rak ka chanh, rak ka khamh tuah tiah a auh i, jesuh nih cun peter cu tii chung cun a chanhchuah. Jesuh nih cun peter cu , nang zumhnaak tlawm, zeiruangah dah lung awttawm in na um tiah a ti.
Zumtu nang le kei zong caan tampi cu, Peter bantuk in a mah sinah kal dingin nawl a kan petu Bawipa Jesuh Khrih kha zoh loin, kan keh kan vorh i, Jesuh kuttang ah a ummi Thlichia le tilet, kan raal sehtan pa tthawnnaak kha kan zoh i kan ttih a si ahcun, Jesuh sin phaan manh loin sehtan pa nih cun tii chungah a kan pil pi ve ko lai.
Sihmanh sehlaw, peter nihcun thlichia le tilet lakim a ka khamh kho tu ding cu Jesuh lawng a si ti kha a hun hngalh tthaan, a harsatnaak chung cun, a mah tein ai khamh khawhlo zia kha a hun hngalh tthaan caah Jesuh cu a mah khamh dingin a auh tthaan caah, Peter cu jesuh nih cun tii chung cun a chanhchuah.
Vawlei thil lawng kan zoh ruang i Sehtan pa nih vawlei ah a kan pil pi caan zongah Jesuh sinah kir duhnaak, bawmh hal duhnaak lungthin ngeih hi a biapi tuk ve. Peter kha a harsatnaak chung khan, Jesuh sinah bawmh hal loin, zeitluk hmanh in a mah tein luatter i zuam hmanh sehlaw, ai luat ter kho naisai lai loh.
Tii chung ahkhan a pil chin chin lai i a nunnaak a dih ko lai. Jesuh sinah bawmh a hal caah thihnaak in a luat tthaan kha a si. Kan nih cio zong harsatnaak chung i Sehtan nih a kan pil pi a si ahcun, Jesuh sawm loin maw kan mah tein i luat ter i tim hrim hrim hna hlah u sih. Jesuh sawm kan hngalh lo a si ahcun Sehtan nih vawlei chung ah a kan pil pi thaai ko lai.
Paul nih cun hi tihin a kan chimh, cung lei lawng zoh u law, cung lei ahcun nan thinlung cu i hngat zungzal u law ,, vawlei ahcun nan thinlung cu i hhngatchan hlah uh tiah Kolose 3:1-2 ahkhan a kan forh fial ve. Pathian lei lawng zoh timi hi a biapi tuk mi a si i, harsatnaak le buai naak kan ton caan zongah Pathian lei lawng kan zoh ahcun lawmhnaak le hnangam naak cu Kan zoh mi Pathian nih cun a kan pek hrimhrim lai.
Peter bantuk in kan nih zong, kan buainaak kan fahnaak thlichia le tilet kha lian tuk in kan hmuh sual ahcun cu nih cun, kan ruahnaak, kan zumhnaak cu lung awttawm in a kan buaiter lai caah, Nang le kei cu kan caah a biapi tukmi Bawipa Pathian lei tu zoh zungzal ko hna u sih!
Mose nih a hruai cuahmah lio mi, Israel mipi hna zong nih khan Pathian lei zoh loin an hnu lei in a rak dawi tu hna, Faro raalkaap hna le, an hmai lei ah lam a kham tu hna Rilisen lawng kha, an zoh caah thinphaang le lungrethei ngai in an buaibai len hna i, heh tiah an hruaitu hna sinah khan an phun an zai hna. Sihmanh seylaw, an hruaitu Moses nihcun Pathian lei lawng a zoh i, a mi hna cu thinphang le lungrethei in um hlah uh, hnangam te khan um ko uh, Tuni ah Bawipa pathian nih akan chanhchuah ding cu zoh ko uh,
Pathian nih kan raal hna cu a kan doh piak lai i, Hi faro raalkaap hna cu a zungzal in nan hmu ti hna lai loh tiah a ti hna i, Pathian bia bangin Moses nih cun a tthiangtthunh in rilisen cu a tuk i, Israel mipi hna kal naak ding lam cu rilisen ahcun Bawipa tthawnnaak nih a hun um ter i, Israel mipi cu tivaraal ah an chuak kho dih. A si nain Pathian tthawnnaak nih, faro raalkaap hna cu an dihlak tein Rilisen kha a fenh ter hna i, an lotlau dih! Israel mipi nihcun faro raalkap le rilisen lawng kha an zoh i, moses nih cun zeizong thil ti kho tu Pathian lei a zoh caah Pathian nih a chanh chuah hna.
Moses bantuk in Pathian lei lawng a zoh zungzal mi hruaitu ttha hi kan herh tatak. Zeitluk faak hmanh in na hruai mi hna nih khan, in soisel in, in zaihnawh peng ko hna hmanh sehlaw, Moses bangin Pathian lei lawng na zoh ahcun na chungkhar, na fale cungah le, na members hna, na miphun hna, na hruaimi hna cungah hlawhtlin naak, luat naak a tlun ter lai tihi hruaitu kan dihlak nih thei zungzal ko hna u sih!
Siangpahrang David zong kha, a raalkaap hna nih raal an doh cuahmah lio ah, a inn cung ahcun a kai i, vaan lei zoh loin vawlei thil a zoh caah Uriah nupi Beshiba a tak ai khawlh lio cu a hei hmuh i, a mit a thiit tuk caah Beshiba cu a inn chung ah a auh ter hna i a ih pi caah Beshiba cu nau a pawi. Vaan lei zoh loin vawlei lawng zoh naak nih a chuah pi mi a theipaar cu ttih a nung tuk i a khaa tuk lawmmaam.
Beshiba cu Siangpahrang David fa a pawi i, a si nain David nih cun Beshiba nih a pawi mi naute cu, Uriah fa bantuk in langhter ai tim nain a hlawh a tling kho lo, cu caah Uriah cu thi seh ti a duh caah raalram ah a hmai cem kal dingin nawl a pek i, Uriah cu raal ram ahcun raal kut in a thi i, Uriah a thi cang ti cu David nih a theih tik ahcun, ka mualpho naak dingin ka luat cang tiin David cu i lawm ngai in Beshiba cu nupi ah tthiit!
David nih khan minung cu a hlen khawh tuk ko hna nain Pathian a hlen khawhlo kha a thei rua lo. Pathian lei zoh loin vawlei thil a zohtu Siangpahrang David ruangah, cu thawk cun a mah David le a chungkhar nih a theipaar an zuun mi cu a kha tatak khah. David le a chungkhaar hna cu buainaak in an khat, a chungkhaar lak ah i thahnawn naak le, ttah aihraam naak, mitthli tlaak naak lawngte an tong khah!
David nih khan vawlei thil zoh loin vaan lei tu kha rak zoh sehlaw, hi bantuk chiatnaak hi a chungkhaar nih an tong hrim hrim lai loh. Vawlei thil zoh naak nih cun ttah aihraam naak le buainaak, sunghzatlaak naak lawng a chuah pi caah, kan nih cu David bangin vawlei thil a zoh mi si loin, Pathian lei, Vaan lei tu zoh zungzal hna u sih law, Kan zoh mi Kan Pathian nih cun a kan zoh sawhsawh hrim lai lo i, kan khrihfabu, kan chungkhaar le, kan khua kan ram ah lawmhnaak, deihnaak thluachuah a kan coter ko lai.
Zei bantuk thil na ton zongah Pathian lei kha zoh zungzal law Pathian nih cun hnangam naak, lomhnaak, luatnaak cu an pek hrim hrim ko lai. Pathian lei lawng a zoh mi hna hi baibal chung ah tampi kan hmuh hna i, Job le Josep, Daniel le a hawile hna le zumtu hmasa midang tampi hna zong nih khan, Pathian lei lawng an zoh peng caah, a donghnaak ahcun Pathian nih khuaruahhar in a cawisaan hna i, Van thluachuah lei thluachuah zong a pek hna.
Cu caah kan nih Khrih a zumtu hna cu Vawlei hnu chiit in Vaan lei panh in a kal cuahmah lio mi kan si hna i, kan keh le kan vorh, kan hnu kan hmai in kan raal pa sehtan nih a phun phun in hnahnawh naak kan pe peng ko hmanh sehlaw, a mah sin ah kal dingin nawl a kan pe tu Jesuh nih Sehtan pa cu a tei cia mi a si ti hngal buin, kan i tinhmi hmun kan phanh khawh naak hnga Vawlei thil si loin Vaan lei zoh zungzal buin kal peng ko hna u sih tiah Bawi Khrih min in kan sawm hna. Bawipa nih kan mah le kan herh ning cio in thluachuah kan pe ko seh.Pu Van Siang Kam