Vawiinah US a damdawi leh ei tur siam chhuahna lama thuneitu sang US Food and Drug Administration (FDA) chuan, mihausa tawntaw buru Elon Musk a telna company “Neurolink” hnenah mihring thluak (brain) leh chip hmanga computer thlunzawmna tur kawnga hmalakna leh enchhinna (human trials) a pe chhuak ta.
Hetianga mihringa taksaa khawl (device) dah phalna leh enchhin (clinical trial) phalna pek a ni ta hi hmasawnna ropui tak ni turah Elon Musk chuan a ngai.
Tun hma deuh khan Tesla factory-SpaceX neitu leh Twitter, US$ tluklehdingawn 44 a leitu Elon Musk hian device chip leh thluak thlunzawm phalna US sorkarin a pek phawt chuan leh mihringte tan a him a nih chuan ama fate thluak leh computer/robot thlun zawm a phalsak ang tih a lo sawi tawh thin a ni.
Elon Musk hian nikuma Twitter a lei hnuah amah chu CEO angin a awm chho a, mahse, tun hnaiah Chief Executive Officer (CEO) atan Linda Yaccarino a ruai ta a ni.
Thluaka device chips dah a lo nih chuan Computer atangin thluak hna thawh dan leh mihring ngaihtuah zawngte chu an hre zung zung tawh mai dawn a ni. Khawvel finna thiamna sang zel hian, Pathian thiltihtheihzia leh ropuizia a tilang a tihtheih awm e.
Neuralink chuan Twitter-ah US FDA ten mihring dinhmun zir chianna (human clinical study) tura phalna an pek thu chu hahipin an lawmzia an ziak a, Elon Musk pawhin a rawn tweet nawn nghe nghe. The Washington Post-in zawhna a pek erawh Neuralink leh FDA te hian an chhanglo a ni.
Kum 2017 khan Elon Musk hian a tunneling firm, The Boring Company tihah US sorkarin device chip leh mihring thluak thlunzawm tir phalna tawngkamin a hmuh thu a lo sawi chhuak zauh tawh thin a ni. Neuralink chu enge a nih?
Kum 2016 a din Neuralink company chu Fremont, California-ah din a ni a, chu company chuan mi 400 ruaiin, a lo berah US$ maktaduai 363 zet an tuak chhuak niin data-provider PitchBook a sawi.
Elon Musk chuan Neuralink-ah a sum a thawh hnuah leh mihring thluak leh computer thlunzawmna thil an kalpui hnuah investors ten an ngaihven zual phah hle a. Hetianga mihring thluak leh technology/ computer thlun zawmna thil chuan khawvel ngaihven a hlawh zual tir phah hle ( Elon Musk chu lo sakawlh /666 hmuh mai loh tur aw!)
Thangkhat liamta atangin mihring thluak leh computer thlun zawm dan tur hi an lo zir nasa tawh thin a, chung company zingah Blackrock Neurotech, Salt Lake City, Utah a awm leh Synchron te chuan enchhin (clinical trials) nan khawvel pumah mi 42-ah an lo enchhin tawh niin an sawi.
Microneedles (hriau tereuh te te) 100 chuang te chuan thluak thlun zawmin, chu chu computer-ah lo langin mi ngaihtuah te a hre thei dawn niawm tak a ni. Hetiang brain implants hi atangkai hle ang. Neurolink te hian theihtawp leh tih tak zeta hma an lak vangin US Food and Drug Administration pawhin phalna pein, an pawmpui ta ni a ngaih a ni.
Neuralink te chuan micro-chips chu mihringte thluak nena an thlunzawm that theih chuan pianphunga rualbanlo (paralysis) ang chi mitdel, bengngawng leh thau uchuak leh rilru hah leh chau ngawih ngawih te leh autism, schizophrenia enkawl (telepathy) nan te pawh tangkai hle turah an ngai.
BBC News chuan brain implants hi Swiss researcher te pawhin an lo bei tawh a, Netherlands mi pianphunga rualbanlo chuan kal theiin a in ngaihtuah a, a ke leh kephah te chu a chet tir niin a sawi.
Reuters leh The Guardian news chuan, Neuralink hian kum 2022 khan US FDA hnenah micro-chip leh thluak thlun zawm phalna an dil a, mahse, an dilna chu hnawl sak an ni, a ti.
Hetianga an thil zir chiannaah company chuan ramsa leh ransa, 1,500 zet an tihhlum phah a, beram 280 bakah vawk leh zawng te chu kum 2018 atangin an tihlum a, hei hi Animal Welfare Act dan bawhchhiatna awmin an sawi. Crd: CT LALRINAWMA