Ka catialmi hi a dongh tiang na rel hlan ah comment tuah lo dingin kan nawl hmasa. Laimi/Chinmi cu pupachan in siangpahrang a rak ngeimi le miphun dihlak uk kho cozah a ngeimi kan rak si lo, pengtlang tete in ramukbawi nih a rak kan uk tikah mitampi cu kan ruahnak pengtlang varai tiang a pet kho taktak rih lo.
Cutikah miphun huap in cozah le ralkap sernak dingah miphun a dawmi mihmasa hna nih CNF/A an rak dirh. Caan a kal I rualremnak miphun huap in an tuah kho in miphun ai an awh kho lo ti usihlaw kan palh tuk lai lo dah. Hakha, Thantlang le Matupi nih cun 100% in kan tanh (keizong nih) ti usihlaw kan palh tuk lai lo dah.
Pengtlang tampi nih kan hmuh ning le huatnak kong cu nan theih tuk ko caah ka tial ti lai lo, miphun huap ralkap ah an pom bal lo i zei ngaingai ah an rak rel lo. Zei ngaingai zong cu kan tanh rúp le kan dirpi rúp in an rak si ve fawn lo i tha a rak đi in lung a rak dong ngai tawn. An mawh lo ka ti mahtluk an huat chap ah bochan an rak tlak lo ning kha mu.
Ramchung ral a thawhka tein khan kan nau le KKG pawl CNA camp (Camp Victoria) ah bawmhnak hal dingin le hriamnam hal dingin kan rak fial hna, kan ralkap a va kalmi nih an kan timi cu “CNA sinah meithal zeihmanh an ngei lo bochan tlak zeihmanh an um lo e” a kan ti cu ka thìn a rak hàng kho tuk ve. CNA a rak huatu pengtlang tampi zong nih bochannak thar he an va fuh ve hna i an ruah ning an rak si lo tuk ve tikah an tih tuk lem ti hna lo i, an bia an ngeituk lo nak zong hi asi rua ka ti.
ASINAIN ZEIDAH A CANG? Asinain mipi nih biatak tein ram a vun buai hnu in thazaang an vun pek hna, phaisa siseh, mipum hrimhrim in siseh, thadihlak chuah in miphun le ram caah tiin dirpi chinchin a vun si. Sianghleiruun a kaimi thiamnak tampi a ngeimi nih an thiamnak he an vun tamh moih chinchin
A dik lomi le miphun caah a him lomi misual an tlau chinchin, system thar tampi an chuahpi len cang, pengtlang kip an i tlum kho chinchin, thleidannak um loin kau chinchin in lam an sial peng. Nihin ahcun Chinland Defense Forces (CDF) pengtlang 18 fonh nih an ngeimi hriamnamtha (auto-guns) nakin CNA nih a ngeimi a tam deuh cang ti a si.
Nihin ahcun kan duh zong duh lo zongah Chin miphun a kan huap khotu ralkap nganbik an si cang. A hlan ahkhan cun Hakha/TT nih miphun huap ralkap in kan pom i midang nih an pom ve lo caah buainak le i hmuh thiamlo nak lehlam a rak chuak, a chinchap lo ah zei ngaingai thazaang an rak ngei lo chinchap.
Nihin ahcun hriamtlai CDF phu 16 pengtlang kip fonh nih miphunpi ralkap ah an pom i Chinland Council tiang zong a kan lead khawh cang. An lung zong hi asau ka ti khua caan ahcun pengtlang hruaitu pawl kip an duhnak an zulh piak tuk nak hna ahhin khua hi an tlai deng tawn, tiin ka rak hrang lengmang ve.
Zeikhawm asi ah hlan lio CNF/A cu Hakha/TT nih 100% in kan rak dirpi mi le thazaang an rak ngei taktak lo ti ko usih, pengdang nih an kan huat phahnak le miphun ah kan lung a rak i rualonak le bia kan i alnak bik cu zong a rak si. Nihin ahcun kan lung kan i rualnak CNF/A ah asi cang.
Hlanlio CNA le nihin cu an i đangtuk cang, minung zong an i đang cang, an thazaang zong an i đang tuk cang. Hlanlio CNA le nihin CNA cu pafa bantuk in an i đang cang caah lunghrinnak le zumhlonak a pelte hmanh um loin tan la chinchin hna usih, ram le miphun caah CNF/A thawng chinchin ko seh!
Biadonghnak. Asinain CNA an si ah, CBCUSA an si ah, Vaurawng an si ah, Chinland Club le Global Rawn Chin group a si ah, kan diklonak le palhnak cu chim thluahmah ko u. Minung cu a palh kho lawngte le hnangamtuk sual kho mi kan si tikah, mipi au-aw hi hmailei fonnak dingah a biapi tukmi asi, pumpak huatnak si loin. Kan palhnak le tlamtlinlonak hmanh kan i chim ngắm ti lomi group or phu cu miphun caah tih a nungtuk mi asi. Cun pumpak zalawnnak a dirpi tukmi group kan si fawn.
“Dothlen lio ah palhnak rak chim tuk cu a tha lo” timi bia hi dothlen thokka ahkhan cun tampi kan hmuh i kan theih, kum 3 deng kan experience tikah CNA,CDF le Supporting team pawl a palh komi kong chim lo le phuan lo tu kha miphun caah tihnung deuh mi asi, tiin kan pom thlap. Chelsea Bawi