Mah bia tlangtar hoih in hmaitonh ah siseh, phone in siseh a dang dang in siseh a ka halmi an tam ngaingai, mah tiangtiang a thei mi le a hngal mi ka si lo ca ah fianghlang in ka let bal hna lo. A kum in hriam cu ka tlai ve cang i ka theihtawk ka fian tawk in zapi nih theih an duh cio theu ve lai tiah a tawi nak tein ka hun fianh ve lai.
Ok… yiah cheukhat nih One command (Raltuk nawlpeknak hmun khat) ah an duh lo? Ummmm… an mawh lo cu teh, bawi le lal cu minung a si mi poh nih duh dih le i cuh dih pei a si cu, an mawh hrimhrim lo. Kanmah cio vun i siter hmanh uh, bawi ciocio ah ralkap lak i bawi le Cozah menmen i bawi hi ai khat lo hrimhrim.
An i fonh duh lonak a ruang bik hi, “Luhmuhzi le ralkap,” timi hi an thleidan khawh lo ca ah a si bik ko. Ralkap (hriamtlai) lak ah tih a nung bikmi cu Luhmuhzi (Naihniam zohthiamnak) hi a si bik.
Luhmuhzi hi ralkap ca ahcun tih a nung mi, rul chiahru mi cuk bantuk a si. Chim duhmi cu atu ah Chinmi cu kan tlawm te nain atu ah hriamtlai phu tampi kan chuak, hriamtlai phu tampi kan dirh (bawi duh le lal duh ahmu).
Hriamtlai phu tampi chung ah pa bik le fuhpanh bik cu CNF/A an si thiamthiam (CNA ralkap ka si ruang ah ka chim mi a si lo). Raltuk caan ahhin CNA lo ngaingai hin cun zei tihmanh khi a si kho mi kan si lo ti cu kan i hngal kan i thei dih cio ko nain khin cheukhat hriamtlai phu nih luhmuhzi le ralkap zei a si kan theithiam tawn lo (a poi taktak). CNA ralkap hi a cunglei k chim cia bang tu dothlennak ahhin pa bik an si, bochan bik an si khoika poh nih bochan mi an si.
Chim duhmi cu atu ah hriamtlai phu tampi nih, CNF/A fuhpanh, cawm le ken (a zeizongza in) an si ti ning law ka palh lai ka ruat lo. Hi a si ko bu ah cheukhat hriamtlai phu upa cheukhat nih hngal ngai le sang ngai in kan pule an ti hna tik ah kan pu le nih luhmuhzi le ralkap aa ral ti an theih i a sining tein an ti tawn hna an leh tawn hna.
Thil sining le a umkal ning in ti tawn an si ca ah a no tuk rihmi hruaitu nih celh hna hlah kaw CNF/A cu e kha e an ti tawnnak bik hi a si. An duh ning ahcun kan pu le nih hin anmah nak sang in anmah nak ceu in kan chawnbia hna seh, anmah nakin ral kan tu ralhmai an suang kan ti hna seh ti khi an duh (A tak ah a si kho mi zong si nain a si naisai fawn lo).
Kan pule nih ralkap le luhmuhzi zeitluk indah aa ral ve ti khi an theih tuk ca ah sang ngai aa chia mi le lor ngai a ummi hna khi zei cukha ah an chia ve hna lo i sang ngai le lor ngai nun in in a nung mi hna nih an i fonh duh lonak bik a si lai tiah khin ka hei ruah.
Mah lo cun a ruang khi ka ruah setmat i an i fonh duh lo nakding a ruang a um lo. Keimah ruahnak mu. Hmunkhat te ah raltuk le raltuk nawlpeknak hi ral a tu taktak lomi upa le hruaitu nih zeitluk a biapi ti hi zaa ah zaa an thei kho lo.