Chin National Army (CNA) In Ralkap Pakhat Nunnak Liam. Chin National Army (CNA) in ralkap ṭuan lio Aung Naing nih pawfah dam lonak in Kachin ram ah mual a kan liamtak tiah kan theih.
Amah Aung Naing hi kum 27 a si i ram le miphun ca dohthlennak ah aa zuam cuahmah lio nihin February ni 21 ah a kan liamtak hi a si.A kan liamtakmi Aung Naing hi Chin ramkulh Paletwa khuami a si tiah theih a si.
Relchap- America ahhin Laimi (Chin) kutdok le umnak ngeilo kan tamtuk cang. Riantuannak nawl pek ti lomi, kum 10 renglo a um nain green card le social hmanh ai ngeih ti lomi, zeitik hmanh ah US citizenship a phi kho lo dingin tuahmi kan tamtuk cang. Keimah nih ka mit in ka hmuh mi le ka motor in ka phurh mi hmanh an um len, ka theih lo le hngalh lo an tamtuk rih lai.
Kan ram harsattuk ruangah thlichia le ti lét lakah kan fale caah ruahchannak nganpi he ramthumnak kal dingin Malaysia kan panh cio hna, thih le nun riin Malaysia harsatnak in USA kan phan kho hna Pathian thawng in.
America ramah kan fale tampi cu cawnpiak khawh ti loin gangs minung za in an um, lainawngmi an tam cang, fir le inn boh in thong an tlak a tamtuk cang.
Aho fa ka pawi ti ai theih lomi an tamtuk, minak fa poi in vaivuan mi kan tamtuk cang. Kan i ruahchanmi Vancung khua tahchunhmi America ram cu kan caah ngaihchiatnak, mitthli tlaknak, thihnak le nunsivang in kan umnak ram ah a cang tawn cheukhat kan caah cun.
Khua kha vun ruat than hmanh u, thih le nun riin ruahchannak nganpi he harsatnak phunzakip kan rak tonmi vialte kha, nan lung a fak in nan ngaih a chia ko lo maw? Pathian tel loin khawika hmun hmanh hi kan caah san a rak tlai hlei lo nan ti cio ko lo maw?
Nulepa hna America ahhin rumnak, fimnak, hlawhtlinnak, thanchonak le lunghnangamnak hi a rak um lo. Pathian thei bu tein le ralring tein na nun i na chungkhar na zohkhenhnak ahkhan ai hngatmi a rak si cuh.
Zeitluk ralring in na rak nun le zeitluk in dah na chungkhar le fale caah na rak i ralrin kha vun tuak than hmanh, zeitluk tam in dah na chungkhar le fale na caan na rak pek kha vun i check than hmanh, hi vialte a cannak cu nangmah thiamlo rumro kha a si ko lo maw? Chelsea Bawi