Ramukbawi hna Sawmtuk bantukin CND kan tuah mi hi a dik lo. CND hi Falam Conference lawngah asi fawn lo I Falam Conference cu 20 February theng te ah tuah mi asi lo. 19 – 21 Feb 1948 ah an tuah mi tu asi. 1940 February 20 Cu Kanpelet Banda Revolution tuah ni asi. Vumtu Maung le Chin Mino 8 nih hruai mi, Chin Mino 130 leng nih Chinram zalonnak caah Dohthlennak an tuah ni asi. Magway Commissioner Minci Mr. A McCracken nih an zapi tein thong a thlak dih hna. Vumtu Maung cu Japan nih Katha (Kachin) thonginn a kah lio ah thonginn a rawk caah a luat ve mi asi.
Miphun dang nih Phun Pi Ni an ngeih dih caah Chin Phun Pi Ni ngei awkah Chin Vuanci Vumtu Maung nih a duh. Chin Identity Puai si awk ah asi. Chin Affair Council Meeting cu 1950 October 9 ah an tuah. CND si awk ah biatung an chuah pi mi hna cu: Banda Dohthlennak Ni February 20, Falam Conference February 19 – 21, Chin Special Division Acts a nung ni 12 October, Maymyo Inquiry Commission thlah ni April 20. Vote an thlir tikah 20 February nih a tei caah Aruang an bet chih mi ah, Falam Conference hi aa tel mi asi.
An bet chih rih mi cu Falam Conference tuahnak ah February 20 ah CHINRAM fimthiamnak Commission kan tuah khawh, Democracy phung kan thawk khawh, Banda Dohthlennak Ni cu February 20 asi caah, 1948 February 20, Zinglei suimilam 11 cu Chin Phun Pi Ni siseh tiah Chin Council nih an fek ter. Falam Conference a dih hnu kum 2 a rau hnu 1950 October 5 ah CND cu an fek ter. CND an tuah hmasat nak cu 1951 Feb 20 Mindat ah asi. Rampi Vuanzichu (PM) U Nu nih a tel pi hna.
Falam ah Conference an tuah mi hi Ramukbawi uknak duh le duh lo he pehtlaihnak aum lo. Dominion Status le Panglong ah zeidah an duh dueh, Chin Mipi nih I thim hna seh, tiah Mirang nih Maymyo ah Inquiry Commission an tuah I an thlah mi hna an si. Atlantic Charter ning in British nih an colony cu Zalonnak pek ding ti si. Atlantic Charter ningin Kawlram (Mandalay, Sagaing, Magway) lawng in Zalonnak pek ding, CHIN KACHIN cu Dominion Status in Mirang nih kum 10 uk rih ding. Uknak le fimthiam nak kan cawnpiak hna lai I kum 10 ah an thiam lai. Cu hnu ah CHINRAM (Country) an dir te lai ti hi Dominion Status amuru cu asi.
Atlantic Charter ningin Uk Sang sinah Mirang nih Zalonnak pek ding mi cu Mandalay, Sagaing le Magway Division 3 lawng asi. Cu hmanh azapi tein aa tello. Kalay – Kabaw – Gangaw, Asho Chinram le Arakan Hills Tract cu CHINRAM an si. Bago, Irrawaddy, Thaninthayi, Rangoon Divisions Cheukhat cu Mon Ram (Thaton) asi. Rangoon tam deuh, Bago cheukhat, Irrawaddy Tamdeuh, Mandalay Cheukhat cu Karen ram asi. Sagaing Cheukhat zong Kachinram asi. Mandalay Cheukhat cu Shanram asi. Mirang nih Zalonnak pek ding mi SHAN Country ah Wah State tbk hna kha a rak um cia mi asi. Atlantic Charter ning ahcun Shan Country asi lai I, a tutan EAOs in a buai mi hna vialte cu State an si lai ti asi. Cucu SHAN Federated State (RAM) an ti mi cu asi.
Uk Sang nih Zalonnak lak awk ah England a kal tikah Mandalay, Sagaing, Magway Division 3 lawngin Zalonnak pek awk ah Mirang nih an ti. Uk Sang nih Mirang chan Kawlram vialte luatnak caah ka ra tiah a ti hna. Mirang nih NO NO NO an ti. Atlantic Charter ningin Kawlram he Zalonnak pek awk ah Tlangcungmi aa tello tiah Mirang nih mithmai zoh loin an ti caah Uk Sang cu a rak kir I, Panglong biakamnak a tuah pi hna.
Kachin nih Anmah tein Zalonnak hmuh awkah Mirang hi Voi 2 an hal cang hna. Ramuk khawh ding nan si rih lo caah Dominion Status in kan in uk hna lai an ti. Kachin nih YES Amen an ti ve. Chinmi zong nih Dominion Status cu YES AMEN an ti ve. Shan le Karen cu Ramdang ah Sianginn kai mi le mifim an tam caah anmah tein Ram dirh awk ah (Mirang pen hlan ah ram an si bantukin) Mirang nih a cohlan cang mi ansi ve. Dominion Status Bantukin Uk Sang nih Panglong ah bia a rak kam hna. Kum 10 hnu chuah khawh asi. Chuah duh lo ahcun Federal Democracy ti si. A kaa in kawl fangkhat, CHIN fangkhat, Kachin fangkhat tbk in bia a kam chih hna.
Cucaah Chin Mipi nih thimh awk ah thil pahnih aum. Burma Proper (Panglong ningin) ah fonh maw an duh? Dominion Status in ti asi. Cucu hlat awkah Maymyo ah Inquiry Commission cu an dir. Khuakip ah kal a har caah Falam ah conference an tuah mi hi asi. Panglong ningin Kawlram he I fonh an duh lo ahcun Mirang nih Dominion Status in uk rih ding kha biahal awk le hnatlaknak lak awk ah Falam ah Conference an tuah mi hi asi. Ramukbawi 17 nih Dominion Status an duh I, 5000 nih Panglong kha an cohlan I an duh deuh. Panglong an cohlan caah Democracy ningin Kawlram hruai awk asi cang. Ramukbawi hna cu duh lo zongah an tla cang. Democracy cu mipi thimh mi ti asi caah vote thlak nolh a herh ti lo. Mipi thimh mi nih ram uk ding asi cang.
Falam conference ah Ramukbawi hna an thingram an chut hna timi aum lo. Upadi dang tuin an ram an sung hi asi lai. Ramukbawi hna cu pension pek awk ah le Bawmh nak phaisa pek awkah Chin Affair Council nih 1948 September 30 ah Pyidaungsu Hlutdaw an hal piak hna tiah Tuanbia ahcun a um. Sakhuah rawlrel le Khuachiah khawlh ti lo dingin Chin Hruaitu hna nih an lemsoi (an nawl) hna. Saal zuat cu Mirang nih an cohlan ti lo tiah Lawyer David Ngai Sak le Professor Zapeng Sakhong nih an ti.
Ramukbawi hna cu Mirang nih Kawl hi zumh hna hlah uh, anmah tluk nan fim lo caah an saal nan si zungzal lai, Panglong zong hi zumh hlah uh, kawl cu an zer tuk caah an in hlen hna lai, Cucaah Dominion Status hi duh ko uh tiah An pu le Mirang nih an ti hna. YES AMEN an ti ve. Cucaah Panglong ningin Burma Proper he I fonh kha an duh lo. Cuticun Falam ah Panglong kan cohlan lo tiah vote 17 an pek mi kha asi. Cucu Democracy an duh lo tiah Tuanbia ṭialtu cheukhat nih an ṭial.
Mipi le Chin Vuanci, MPs hna nih Panglong an thim kha Uk Sang thih hlah sehlaw, a dik bak mi asi. Zalonnak kan hmuh thla 9 ah Panglong a rawk caah Ramukbawi rual nih Vote 17 Dominion Status an duh mi cu asi khawh ve ti lo. Chin Country si awkah Kum 75 kan rau cang. Chin Country loin Federal kan ti le a sikhawh fawn lo. Falam Conference cu CHIN COUNRTY hrawktu bantuk asi cang. Pau Dohthlennak ah CHIN Country aum kho hnga maw? Cucaah CND ah Ramukbawi hna Sawmtuk ti hlah. Saya H.Rung kaw