SAC nih hramhram uknak a laak hnu in KNU hmunram brigade 7 ah SAC ralkap nih tukdohnak a tuah ruang ah 2023, March thla tiang ah ralhrial dirhmun phanmi sing 5 leng tiang an phan tiah KNU in Padoe Saw Tawni nih a chim.
2022, December thla tiang ah ralhrial dirhmun phanmi 360,000 tiang an si nain 2023, March thla tiang ah 500,000 tiang an karh tiah a chim. KNU brigade hmunhma 7 chung in hmunhma 5 Mutraw pengkomh le Doepalaya pengkomh ah nitin in kahdohnak a chuah caah ralhrial dirhmun phanmi hi an karh tiah a chim chap.
April 29 le April 30 ah Myawaddy he meng 7 hrawng aa hlatnak Mekanay khuakomh ah KNU/KNLA phufonh le SAC ralkap, BGF kar kahdohnak a chuak.
Kaphnih kar kahdohnak ruang ah Mekanau khuakomh in chungkhar 100 hrawng cu
Thailand-Myanmar ramri Mae Sot pawng Palaw Tapuh(ပလောတပို့) ralhrial umnak camp ah an i dor hna. Cuka camp ah cun ralhrial chungkhar 1000 hrawng an um cang i, eiding le ṭhutdirnak kong ah herhbaunak tampi an ngei tiah ralhrial umnak camp ah volunteer ṭuantu hna chung in ṭuanvo ngeitu pakhat nih a chim.
Kayin ramkulh KNU brigade 6 hmunram Dawna tlang ni chuahlei Thailand-Myanmar ramri Myawaddy le Laykaekaw telh in khua 30 hrawng in tualchung mi 15000 leng ralhrial dirhmun an phan tiah ramri ralhrial camp ah volunteer ṭuantu hna nih an chim.TCP