Hriphi khuami Hakha um Pi Zing Thai (Tial Or nu, an pa Pu Ral Kam) nih The Hakha Post ka tuan lio (2015 or 2016) lio ah nihin kan ram buai thisen a luan lainak le rawl ei awk a har ding mi kong Hakha an inn ah a rak ka chimh i The Hakha Post ah ka rak chuah mi cu a tling cuahmah.
An pa Pu Ral Kam nih “Kan nu hi rawl a ul i thla a cam peng mi a si. A thlacamnak ah Pathian nih a hmuhter mi thil hi amah kan nu tha tein rak hal law rak theihpi ve law ka duh,” tiah ka inn ah a rak ka chimh.
Cucaah an inn ah ka va kal i ka hal i the tein a rak ka chimh. A chim mi lak ah a biapi mi thil pathum kaa chinchiah i nihin ah a tling cuahmah mi hna cu:
1. Kan ram ah thisen a luang lai.
2. Kan ram ah rawl a hartuk lai ca ah atu tein rawl i khon cia u.
3. Cu ram buainak cu a donghnak ah ramdang Mirang tlaangtlaaknak in a dai te lai,” ti an si.
(A dang nihin kan ram buainak ding le kan ramkheel kong a chim mi a um nain a ca zoh lo cun fiang in ka chim thiam ti lo-ka palh sual lai. Mah lio kan ca chuah mi aa chiah mi nih fiang deuh in zoh khawh a si)
Khuaruah har ngai a si mi cu, hi a ka chimh lio hi kan ram a daihbik lio caan (Tlangcung hriamtlai pawl vialte le U Thein Sein Cozah remdaihnak an tuah i remnak khuallam-honey moon khuallam an rak zawhti lio caan a si. Hriamtlai vialte nih an meithal an tun i ramchung ah rammi he cozah le ralkap hna he an thutdirti lio caan a si.
Kha lio caan i kan ram ah “thisen fakpi in a luang lai” ti le “kan ram ah rawl a hartuk lai ca ah atute hin rawl i khon cia u” ti mi bia a rak chim mi cu keimah zong nih ka rak zum kho ve lo.
Asinain “Pathian nih a ka hmuhter mi a si” a ti ca ah “an hmuhter lai lo” tiah ka ti khawh ve lo ca ah le, cu thil tihnung kan ton ding kha Pathian nih rammi nih an theih a herh tiin a chimh mi a si khawh ve ca ah cucu kannih Journalist le media kan rian a si ve ca ah The Hakha Post in ka rak tial i ka rak chuah.
Cucu, nihin ah (1) le (2) cu a dik pin ah a tling tak ko cang. Al awk a um lo tiah ka ruah. (3) nak belte hi a donghnak lei i a cang ding a si ca ah zeidah a lawh lai cu zoh cio ding a si hnga.
“Atu hin facang i khon u” a rak ti mi cu ka hal lio ah “Atu bak hin maw kan i khon cia cu a herh ko?” tiah ka rak hal i “Aw, atu hin nan i khon cia a hau ko” tiah a rak ti.
Nihin ah kan rampi le abik in a chimtu nih a chimnak Hakha khua ah rawl ei awk a har ning le hi pin ah hi nakin kan har rih khawh mi a si tik ah nihin kan ram nih kan ton ding mi thil hi Jerusalem nih a ton ding mi kha Jesuh nih a rak chimchung bang khan a rak chimter ve mi a si ko rua.
Amah Pi Zing Thai tu cu atu ram buai hlan deuhte ah khan a kan thihtak cang. An pa Pu Ral Kam tu cu Hakha ah a dam rih i a duh mi nih amah zong fiang deuh in hal khawh a si. Papui