American Ramdang Lei Zung Ruahnak Petu Nih Tlangcung Hriamtlai Phu 4 A Ton Hna. American ramdang lei zung ruahnak petu Derek Chollet nih atu lio i SAC ralhrang dohtu tlangcung hriamtlai phu 4 (K3C) he i tonnak kan ngei, tiah a Social Network X (Twitter) ah a langhter.
K3C ah aa telmi tlangcung hriamtlai phu hna simi Kachin Independence Army (KIA), Karen National Union (KNU), Karenni National Progressive Party (KNPP) le Chin National Front (CNF) hna cu Derek Chollet nih tonnak a ngeih hna hi a si.
“I tonnak ahcun Myanmar ramchung tlangcung hriamtlai phu hna nih Federal Democracy phunglam an i zuamnak kong he pehtlai in ceihmainak an ngeih bantuk in Myanmar ram mizapi caah a himmi, zumhtlakmi le a ṭha deuhmi ruahchannak ca ah a herhmi bawmhnak hna le ram kip in pehtlaihnak a ṭha deuhmi an ser khawhnak ding ah ceihmainak zong kan ngei” tiah Derek Chollet nih a Social Network X (Twitter) ahcun a ṭial.
A luancia February 24 zong ah NUG cozah in ramdang lei vuanci a simi Daw Zin Mar Aung le Derek Chollet cu i tonnak an ngei i Myanmar ram Democracy kong le tlangcung hriamtlai phu hna he a ṭangṭi mi an si nakkong hna cu ceihmainak an rak ngei cang, tiah theih a si.
American ramdang lei zung ruahnak petu Derek Chollet he i tonnak a ngeimi K3C tlangcung hriamtlai phu hna cu atu hi SAC ralhrang sakhan pawl kahdoh in an laak cuahmah lio a si i KIA nih Kachin ramchung um SAC ralhrang sakhan 30nak tlawm lo a laak khawh cang bantuk in KNU kuttang um hriamtlai phu hna zong nih Karen ramchung um SAC ralhrang sakhan pawl cu an kahdoh hna i an laak hna, tiah theih a si.
Cu pinah Karenni ralkap KNPP/KA zong nih Karenni ramchung um SAC ralhrang sakhan pawl cu kahdoh in an laak lio pi a si i Chin miphun ralkap CNF/A zong nih ṭangṭi phu hna he Chin ramkulh chung um SAC ralhrang sakhan pawl, khuapi hna cu kahdoh in an laak lio a si. Lungmili Post