Thantlang biatak tein bomb a thlak hnu ah Lungler lei ah a zuang tthan i tuhi Lungler khua cung ah vanlawng ai hel cuahmah caah khua mi pawl cu tensikhur ah lut dih uh tiah hruaitu te nih an ti hna.
Tuni ASC ralhrang cawlcangh ning zoh tik ah kan pasalttha vialte an cihmit dih taktak an timh cang ko rua, si nan a nung lo mi pathian biatu nih a nung Pathian a bia mi cu zeitik hmanh ah an kan tei lai lo. Khi tluk khin tuni ah ralhrang nih Thantlang kan pasaltha hna bomb a thlak ko hna nain an him.
Kan Pathian nih umpi in kilveng hna hlah sehlaw cu zeiti bang hmanh in luat khawh nak ding lam khi a um ti lo, A zeizawng te hi kan Pathian thawng lawnglaw an si ko. Kan umnak hmun le ram cio in kan miphun caah thlazacam peng rih ko hna u sih.
Nihin chun Thantlang i bomb an thlakmi cu rel cawk asilo tiin an ka thanh. A thawngpang hi khua lamhlapi tiangin ai thei. Tukar hrawng hi a thlakmi cu a tam kho taktak cang. Vanlawng he, helicopter he Hakha leiin hriamngan he nifatin a thlak.
Chunzan in တံတားဦး၊ မုံရွာ၊ ကလေး၊ နေပြည်တော် i vanlawng cawlcangh dan hi ka cuan tawn, lungre thei ngai khin ka um ve. Hi vialte Vanlawng le Helicopter nih a kan den tlukin kan minung nunnak a liammi hi a um setlo ti awk asi. Nizan Thantlang i a puak manh lomi (a tlolhmi) ko hmuh ah tuk a sum, a puam kho taktak.
Kan pale nih tuante in vanral vennak an ti tawnmi kha, vanlawng kahnak le thlaknak hriamnam tu ah siloin; khatlei in kan nu le kan pale nih rawl ulh in mithli he an aunak, zankhuadei thla an camnak hriamnam tha in kan him kan ti khawh. Kan ralkap hna nih an facebook cahmai i ca an tialmi ka hmuh; an vanlawng hna nakin a sang deuhpi ah a ummi Pathian kan ngei an ti.
Kan ralkap hna cawlcangh zia a thiamtertu kan Pathian, kan ral hna mit a vaivuanhtertu kan Pathian, Vanral a kan ven piaktu kan Pathian; Jehovah Shammah, Jehovah Rohi, Jehovah Nissi. Ram Tinthei
Hakha In SAC Ralkap Nih Miakpi Voi Tam Ngai An Kah Cang. Chin ramkulh khuapi Hakha in Thantlang leikap ah miakpi voi tam tuk an kah cang, tiah theih a si.
Nihin February ni 16 khuadei hlan deuh in luatnak lungphun umnak (လွတ်လပ်ရေးကျောက်တိုင်) in SAC ralkap nih miakpi in Thantlang lei ah voi tam tuk an kah cang. Kan i ṭhangh hlanpi in an kah cang caah hngilh khawh a si lo, a thawng thang tuk, tiah tualchung mi pakhat nih a chim.
Miakpi an kah i a thawng a rin thawk in minutes 1 le second 10 a rauh hnu ah Thantlang lei ah a va tla. A tlak thawng zong a thang tuk, tiah a chim chap.
Nizan February ni 15 zanlei zong ah SAC ralkap Helicopter pakhat nih Thantlang ah kahdohnak a tuah i Hakha um SAC ralkap miakpi phu nih miakpi in kah an bawmh hna, tiah theih a si.
Chin ralkap nih Thantlang palik sakhan an laak hnu in SAC ralkap raltuknak Helicopter cu nifatin ti awk in an rak zuang i kahdohnak an tuah. Cu pinah Hakha rungtlang le luatnak lungphun umnak hmun in hriamngan in kah an bawmh hna, tiah theih a si.