Kan bia sau ko seh: Sui Thantlaang ti ruangah Thantlaang khi a ciam, an chuahtaak ti phun khi pingpalo khuacuanh le tuaktaan si.
Uanthlaar le ruamkai a si i, Bible ah Pathian nih a duh lo ti phun; hremnak a si hei ti. Sui hi Bible ah voi 400 leng a țial i, uanthlaar le ruamkai he ai pehtlai colh ballo.
Sui min hman men ruangah Pathian hremnak zong um ballo. Sui in sermi thil an biak ruangah ti le sui nakin cucu khakha an biapi deuh ti lawng um.
Thantlaang nih zeitikahdah sui in sermi thil a biak bal? Ruamkai le uanthlaar hlah e, tuar ciauciau ah tuar khunmi si i cuh hi tangdor phun khat deuh si, ai pumpeek si.
Ram țhatnak ca ahcun chuahtaak hmanh kan sian ti deuh khi si. A herh ahcun raal hmun ah i cang seh ti deuh si.
Bible ah sui nih a hmuhsakmi le langhtermi cu rumnak, lianhngannak, thiltikhawhnak, țhawnnak, zumhnak, dawhnak, biaknak tbk. an si.
Biakam Hlun biakinn le kuang lebang sui in a khat. Vaancung hmanh khi sui nih a thuam. “Vaan sui khua” ti pei si cu, mah cu an i cawn.
Solomon hoi hna kha sui lawngte in a khat, thluachuah si khah. Hman thiam lonak kongah ralrinnak bel a kan pek ko. Thantlaang nih ruamkaipi awk sui khur hmanh a ngeih țung lo.
Bible nih a duh lomi cu sui-ngun chawva biak, hmansual/ hmanluan le Pathian philh tiangin duh le kawl deuh khi si.
Sui Thantlaang i “sui” hi mindin men si. Mindin nih hin zei bia sual hmanh a chim lo. Kan khua hi ai dawh, Pathian pekmi si caah kan sunhsak, a mindin ah “Sui Thantlaang” si seh ti men khi si.
Sui Thantlaang ti hi biazai/hlabia bantukin hlasakthiam le hlaphaanthiam deuh nih an hlawimi si. Hlabia ahcun bia dawh a herh teh.
Thantlaang a ciamhmi hi sui mindin ruangah Pathian hremnak si hei ti phun cu dahngai!!! Pathian cu mithintawi bang vaanvung ahkhin fung he hei țhutter riangmang i, “sui” min a hmangtu poh ruamkaimi an si caah a hrem hna lai ti phun in.
Sui, ngun le daar min hman hi dengteo in uanthlaar le ruamkai si sual hei si colh sehlaw Falam holh in “kan cem” ti bak khi si hnga, mindin lawng siloin mintak ah a tam tuk cu aw. Daar Sui hna kan um, ai dawh tuk si, dawhnak pohpoh hi Pathian in a ra.
Cucaah, purhdah le sualphawt hi i ralring sih. Sui min ngeih hi ruamkai a si colh caah tlaaknak si. Cu ve bantukin Thantlaang zong khi … hei ti phun, ai sengtlai lo tukmi khi an si. Halkha nih i cawn hlah uh tiah hei nolh rih.
Kan khua mindin ahcun ka uar theng lo nain sui mindin a ngeimi khua cungah an chimrelmi an purhdahmi hi adik ah ka chia lo. Ram Leng Chin