Laimi nih BIARUAH timi kan nei. Ka chimpah lengmang theu cang. BIARUAH ti asi caah bia hi a chimtu zong nih RUAHDING, A NGAITU ZONG NIH RUAHDING ASI.
Abik in sa le ral lak ah biachim hi iralrin ngaingai ahau. Information age nih a vun kan phak. Ahopoh nih duhning in media/journalist phunphai in duhpoh chim, duhpoh tuah cio asi. Aho zong nih ithlauh khawh asi lo.
Abik in media phunphai ai tlaih termi, media ethic a pelte zong azul lo mi, athei lo mi, athiam lo mi, cawnnak zong apelte hmanh anei lo mi nuhrin thluak zong in atleng lo mi. Miphun kong ah chi pawngkhat hmanh ava cawi kholo ding zong nih media phun in kan dir lulh, kan chim lulh, kan rel lulh.
Ahal tu zong nih molh le tamh kong lawngte hal, achimtu zong nih hruh le burbuluk kong lawngte chim cang ah cun mipi zapi zaraan cu hruh le molh a vun phomh mi kan vun I haak ciammam le kan ri dih cikcek.
Akarlak ah arak imiak tu cu kan ral kha an si. Kan ral nih menpek haulo in kan sining vialte, kan chungril le kan ruh le kan hliah vialte zong xray hmanthlak nak fiangdeuh in an kan hmuh, an kan theih dih. A hnu ah cun survorh thiamlo mah lukhuh an ti bang kan thih nak le kan loh nak ah ai chuah.
Media le journalism timi hi thil nepte asilo. Thil pakhat kong ah meng athong in an vakal, phaisa tampi dih in mitampi nih an zulh, an dawi an kehrhlai hnu ah hihi mipi caah attha hnem maw ttha hnem lo ti kha tuaktaan bute in chim le rel mi kha atthahnem i hmual anei.
Media kong hi thil pipa tuk asi. Thil ngantuk, Sianghleirun pawl hmanh ah degree anei cang mi pawl nih post graduate studies deuh ah an cawn tawn mi asi.
Internet line a um aipet le ka duh poh in ka chim lai ti I kan ruah sual ah cun apoi ngaingai lai. Chimp oh rel poh hi a ttha hlei lo. A can ah cun kan chim kan rel ruang ah hin thil a rawk mi hna hi a tam deuh tawn. Kan nunnak tiang a liam phah tawn.
Cu caah cun ral lio ah hin “Do No Harm” tiah an timi, Uico lo kal in kal lo hi abiapi ngaingai mi asi. Zei hi dah thlaikheu asi, zei hidah belh asi ti tthate in thleidan thiam a hau.
A cancan ah cun na chimlo mi nih khan bia tamdeuh achim, huham an neih terdeuh pin ah na him deuh. ( Washington DC Radio Free Asia Studio ah recording tuahhlan I an kan timhtuah nak hmanthlak record hlun asi)