𝐂𝐚𝐧𝐜𝐞𝐫 𝐝𝐚𝐦𝐥𝐨 𝐀𝐰𝐤𝐞 𝐬𝐚 𝐞𝐢 𝐭𝐢𝐫, 𝐡𝐚𝐫𝐡 𝐜𝐡𝐡𝐨𝐡 𝐩𝐡𝐚𝐡. 𝐌𝐞𝐝𝐢𝐜𝐚𝐥 𝐚𝐭𝐚𝐧𝐠𝐢𝐧 𝐩𝐚𝐰𝐦 𝐭𝐡𝐞𝐢𝐡 𝐞𝐦?

𝑫𝒓 𝑪𝒉𝒂𝒘𝒏𝒈𝒍𝒖𝒏𝒈𝒎𝒖𝒂𝒏𝒂. 𝐙𝐚𝐰𝐡𝐧𝐚: 𝐊𝐚𝐧 𝐯𝐞𝐧𝐠 𝐜𝐚𝐧𝐜𝐞𝐫 𝐝𝐚𝐦𝐥𝐨 𝐡𝐢 𝐀𝐰𝐤𝐞 𝐚𝐧 𝐞𝐢 𝐭𝐢𝐫 𝐚, 𝐚 𝐡𝐚𝐫𝐡 𝐜𝐡𝐡𝐨 𝐯𝐞 𝐥𝐞𝐡 𝐦𝐚𝐢 𝐚, 𝐦𝐢𝐝𝐚𝐧𝐠 𝐩𝐚𝐰𝐡 𝐧𝐠𝐞𝐢𝐡 𝐚𝐧 𝐬𝐚𝐰𝐢 𝐟𝐨 𝐦𝐚𝐢. 𝐌𝐞𝐝𝐢𝐜𝐚𝐥 𝐥𝐚𝐦 𝐚𝐭𝐚𝐧𝐠𝐢𝐧 𝐚 𝐩𝐚𝐰𝐦 𝐭𝐡𝐞𝐢𝐡 𝐚𝐧𝐠 𝐞𝐦?

𝐂𝐡𝐡𝐚𝐧𝐧𝐚: Natna chi hrang hrangah hian tunhma modern medicine awm mumal hma khan kan pi leh pu ten damdawi chi hrang hrang atan hnim hnah te, ramsa te leh thil dang te pawh an lo hmang tawh thin a. Thenkhat chu tha tak tak niin, dampui te pawh an awm nual awm e. Mahse chung damdawi atana an hman te chu engtin chiah nge a thawh dan tih erawh hriat a tlem viau chuan a rinawm. Chuti chung chung chuan helam thiam bik te kha khawi khua ah pawh an awm thin a, damlo te pawhin an rawn a, an khawtlangah hmun pawimawh tak an chang thin.

Natna chi hrang hrang te hian kan taksa an khawih buai dan a in ang lo fo a. Khawvel thiamna, a bik takin modern medicine kan tih mai hi a lo thang chho zel a, natna tam ber chu a chhan te hriat ni tawhin a enkawlna tur bik pawh research behchhan thlapin hman a lo ni ta ani. Entirnan kan hman tlanglawn leh common ber pawl, khawsik damdawi (nachhawkna ti te pawhin sawi ta mai ila) Paracetamol te hi na a chhawk dan chu kan taksa a na hriatna tura thazam inhrilhchhawn (pain transmission) nana kan taksa tuiril Prostaglandin hnathawh a block a, na hriatna a lo in block ta mai thin a ni. Chutiangin khawsik siamtu kalkawng a block bawk.

Cancer natna i rawn sawi te hi kan taksa timur (cells) insiam sual atanga rawn intan niin chumi timur bik inthlahpung chuan an awmna laia timur tha ho kha an nek chep a, an ti thi bawk a, thisen zam leh kalkawng dang hmangin chung timur fuh lo (cancer cells) te chu taksa peng hmun dangah an tai darh ta thin a ni. Chutiang chu anih vangin cancer damdawi atana an hman te pawh hi an hnathawh dan a in ang lo nuaih a. A then chu direct taka cancer cells ti thi zawnga hnathawk te an awm a, a then erawh an inthlahpun lo veng zawnga thawk te pawh an awm bawk.

Cancer natna hian kan taksa a nghawng dan a in ang lo hle a. A tlangpuiin a lo tai darh tawh hian damdawi chak zawk hmanga enkawl te a ngai thin a. Chung damdawi te chu tha viau mahse kan timur him (normal cells) te an khawih buai tel ve a, chung chuan harsatna dang a thlen fo thin (entirnan sam tlakawlh te). Chaw te an ei tha thei lova, chu chuan an taksa a ti chau zual a, taksa natna dotu immune system a lo chak lova, hrik leh hrileng lakah an derthawng hma ta em em thin bawk a ni.

Cancer vanga damlo chak tawh lo te enkawl kawngah hian i rawn sawi angin “chumi chu a ngeih” tih te hi hriat tur a tam hle. Thenkhat chuan penicillin dip bar te hi a tha lo ti tawk te an awm bawk a. A tha tak tak nge tak tak lo hriat a har hle. Awke sa ei vanga lo chak leh an nih chuan a lawmawm ah ngai ta ila, mahse engtin chiah nge awke sa chuan hna a thawh tih hriat a har avangin cancer vei chak tawh lo midang tana han inchawh ngawt chu a him ber lo thei bawk.

Modern medicine chuan research based in natna enkawl dan tur a duang chhuak a. Damdawi eng pawh mai hi han google ula, a side effect te, a hnathawh dan te, taksa a hna a thawh chhung te a inziak thlap zel ang. Chutiang chu anih vangin keini medical lam mi tan chuan kan hriat loh lam thil han promote hi a rem lova, damlo ten an lo tangkai pui mial anih chuan a lawmawm ah kan ngai mai thin zawk a ni.