US Nih Hriamnam Ttha A Vung Bomh Hna Hnu Cun Ukraine Cawlcangh Ning A Ttha Chin Thluahmah

Ukraine nih Russia S-300 Air Defense Systems a Hrawhpiak. Ukraine chaklei i Russia nih an hmanmi an S-300 air defense system cu Ukraine nih an hrawhpiak hna i, cu an hrawh lio video an zeihmi cu Sunday ah khan an tar, tiah theih a si.

Cu video cu hawihlanbik ah Ukraine military Operational Command South nih an official Facebook ah an tar hmasa. Truck motor muisam a kengmi thil pakhat meikhu nih a tuam i a alh hluahmah lio video ah a lang. Russia nih an i hmanmi an S-300 air defense systems pawl kan kahmi a si, tiin Facebook ah a tar.

“Zelenotropyske ah a ummi an S-300 air defense system cu kan hrawhpiak hna,” tiin an chim.
Zelenotropynske khua hi Kherson pengkulh chungum a si i, Ukraine in chaklei ah a ummi a si. Hi pengkulh hi Crimea in thlanglei ah a ummi a si.

Zelenotropynske in meng 200 hlatnak hrawngah a ummi rilikap khua Mykolaiv pawngte ah a ummi tilawng dinhnak le sehzung inn le lo cu Russia nih S-300 in a kah hna, tiah Sunday ah khan Ukraine nih thawng an thanh.

Sunday i inn le lo an hrawhmi hna hi S-300 system in an kahmi set a si le si lo ai fiang lo nain, a ni le a can tuak tikah si dawhdang cu an si ko, tiah theih a si.S-300 anti-air missile system hi Soviet chan lio ta a si i, a liamcia kum 40 tein hman cangmi hriamnam tha pakhat a si.

Meng 75 tiang hla a kap kho. Chantar hriamnam thatha cu Ukraine ah tamtuk an hman cang caah, July thla detka hrawng khan cu, S-300 bantuk hlanlio chuak hriamnam thing pipi lawng hi Russia ralkap nih an i rinh cang, tiah theih a si. July zarhkhatnak lio i Mykolaiv voi 6 tiang kah a tonmi kha S-300 in an kahmi a si, tiin namhneh a si.

Cu lio hrawnghrang te ah cun, tilawng laknak caah an sermi Kh-32 missiles pawl zong Russia nih baitaktein ai hman hna. June lio i Kremenchuk shopping center i minung 18 le Odessa apartment i minung 20 a thattu hriamnam kha hi Kh-32 missile a si, tiah namhneh a si.

Hi hriamnam pawl an rak ser hnawh chan cu ai dang ngai ko nain, a dang hman awk hlei an ngeih ve ti lo caah, cunglei le rili lei kahnak ah hmang ti lo in, tanglei (lang) kahnak tu ah S-300 le Kh-32 cu an hman cang hna. Cu ti i tanglei kahnak i hman an duh caah cun, Ukraine ralkap an umnak thlathlainak caah GPS systems an hmankep hna, tiah theih a si.

“Soviet Union nih tor le cheng in a zenkuan a sermi vialte zong cu an tharchuah than i, S-300 zong cu tang in cunglei (surface to air) kahkhawhnak thazang tampi an tharchuahpiak, tiah theih a si. Russia nih an sermi S-300 hi phun tampi a um hrimhrim lai.

An S-300 pawl cu Russia nih GPS a bunh hna i, a phunphun in hman khawh dingin an remh. Asinain, a poi ve mi cu, a donghnak ah cun, hi hriamnam i a hmuithiamnak/diknak hi cu rinh awk a tlak taktak lo caah (second rate), sualnak ngeilo mipi an nawngtu hriamnam a si te ding a fiang,” tiin Western intelligence nih an chim. Crd: Chelsea Bawi

Video link zohnak