Ukraine Le Rasia Ral Kong Ah NATO Lubik Secretary- General Jens Stoltenberg Chim Mi

“Ukraine Ral hi Caansau a Rau Kho Men” Ukraine ral hi kum tampi a rau kho mi a si. Russia nih nichuahlei Ukraine ah kahdohnak biatak tein a teitanh than cang caah, Ukraine hi lungfektein kan dirkamh le kan bomh a hau cang, tiin NATO lubik Secretary-General Jens Stoltenberg nih Sunday ah a chim. A tharhlambik le a thabikim hriamnam pawl Ukraine ralkap kan kuat hna a hau.

May be an image of 3 people and outdoors

Cu lawnglawng ahcun Russia kut chungin Donbas hi an humzual khawh lai, tiah Germany Bild am Sonntage newspaper ah Jens nih a chim. Russia nih Kyiv a lak khawh ti lo hnu in cun Donbas lei ah ai mer. Donbas chung hmunhma tampi cu anmah Russia a tanhtu tapung kut ah tuantein a um cangmi an si.

May be an image of 2 people and outdoors

“Hi ral hi kum tampi a rau kho mi thil a si, timi lungthin ngei bu tein timhlamhnak kan ngeih awk a si. Tampi pekchanh (nunthap) hau a va si ko zong hmanh ah, ral hriamnam kan bomh hna lawng si lo in, vawleicung tirawl man a kaimi hrim ruang ko ah hin

Ukraine kan bomhnak hi kan thumh hrimhrim awk a si lo.” tiin Jens nih a chim. “Kahdohnak a linsa chinchin tung le, Ukraine mipi hi an lung a dong sual lai, ti lawng ka phang ko,” tiin Friday i Kyiv a tlawn pah ah British Prime Minister Boris Johnson nih a chim.

May be an image of 1 person and outdoors

“Cu ti ka chim duhnak a ruang cu, hriamnam, zenkuan, raltuknak ca i hmanrua le training pawl hi Russia nak cak deuh in Ukraine kut ah kan phakter hmasa a biapi,” tiin London’s Sunday Times ah a dang tein Johnson nih a chim.

“Russia nih kahdohnak a tharchuahmi nak rang deuh in Ukraine nih a vawlei ai runvennak a thazang khulrangdeuh in a thawnter lai maw, timi ah zeizong te ai funtom,” tiin Johnson nih a chim. Kyiv in meng 340 hlat ah a ummi chaklei Mykolaiv telh in hmunka dang tampi ah a ummi ka ralkap pawl ka va tawl khawh hna, tiah President Zelensky nih a chim.

May be an image of 3 people and outdoors

“Ram vengtu pawl bia ka ruah hna – ralkap, police le National Guard. Kan lung a thawng ngaingai ko hna. Teinak kongah lunghring in an um hrimhrim lo. Chaklei kan vawlei hi mizei hmanh kan pe hna lai lo i, kan ta a si mi paoh cu kan lak than dih lai,” tiin Zelensky nih a chim.

Sievierodonetsk i cuhnak Sievierodonetsk i kahdohnak cu a linsa chinchin ko. Rocket le miakpi in heh tiah Russia nih a kah peng ko rih. Donbas pengkulh a ningpi in lak khawhnak dingah cun Sievierodonetsk hi Russia nih a lak hmasa ta a hau, tiah Ukraine ralkap nih an chim.

“Hi hnu zarh tlawmpal chungah cun Russia nih Sievierodonetsk hi a lak khawh te men. Asinain, cu ti a lak khawhnak dingah cun kadang i a chiah mi a ralkap vialte a pumh hna i cu khua hmete ah cun a hman hna a hau lai,” tiin Washington hrambunh think tank a si mi Institute for the Study of War i mifim nih an chim.

“Sievierodonetsk hi a ningpi in kan kut a phan cang, tiin Russia nih an thanhmi hi lih a si. Khuapi i hmunhma tha deuh cu an kut ah a phan tak ko cang. Asinain a ningpi cu a phan hrimhrim lo.

Va ral ah a ummi Lysychansk khua inn le lo, pumpak inn hna cu an i rawk dih ngawt cang. Kan mipi hna cu lam cung le bomb ralvennak inn tangah an thi thluahmah cang,” tiin Gov. Gaidai nih a chim. “Metolkine khuate zongah Russia nih hmunhma tlawmpal an lak cang. Sievierodonetsk in southeast ah a ummi khuate a si,” tiiah Ukraine ralkap nih an chim.

“Metolkine ah Ukraine ralkap tampi kan kut ah an i ap,” tiin Russia state news agency TASS nih a chim. Luhansk in northwest ah a ummi Kharkiv khuapi cu ral hauka ah Russia nih ser a timh cang, tiah Ukraine interior ministry official nih a chim.

Kharkiv hi Ukraine khualipi nganbik pahnihnak a si i, ral a thawhka thla 2 hrawngah khan faktuk in bomb nih a denmi khua a si. Dnipro in northeast ah a ummi Novomoskovsk i zinan chiahnak inn cu Russia missile 3 nih a tlak caah Sunday ah a puak i, minung 1 a thi, 2 hma an pu, tiah an khuabawi nih a chim.

Kan innpa Ukraine nih hriamnam tlai hlah seh, cun kanmah holh a hmangmi a rammi pawl kilven ka duh caah a tu bantuk in ka tuk hi a si, tiin Russia nih a ti ko nain, Kyiv le a ramdanghawi hna nih cun sualtuk bia ah an chiahpiak.

Friday i EU commission nih an chungtel si khawhnak lam an serpiak in cu Ukraine cu a tha a tho ngaingai cang. Chungtel sikhawhnak lam cu hmaizarh meeting ah tuah tikah an fehter theu lai, tiah ruahchannak a um. Asinain, chungtel tling si nak dingah cun kum tampi a rau rih ding a si. Crd: Chelsea Bawi