Tuluk ram virus maktuk mi ruangah WHO nihcun tonpumh nak an tuah lai

Tuluk ram chungah cun SARS zawtnak hrik he alo takmi virus rungrul thar phunkhat a karh chin lengmang mi he pehtlaiin vawleicung ngandamnak lei phu WHO nih cun tonpumh nak tuah dingah tuzarh chungah Emmergency Meeting an tuah lai tiah theih asi.

Mah zawtnak konglam he pehtlaiin vawlei cung ramkip hna sinah ralrin pek ding maw si pek lo ding timi konglam zong caihhmai nak antuah lai tiah theih asi. Mah Pneumonia virus rungrul thar cu Tuluk ram leng tiangah a karh cang tiah theih asi.

Cun mah virus rungrul thar cu minung le minung karlak zongah an chonh khawhmi zawtnak hrik asi tiah Beijing cozah nawlngeitu pakhat nihcun January 21 ni ah khan thanh nak arak tuah. Tuluk ram laifang hrawngah um mi Wuhan khuapi ah mah zawtnak hrik coronavirus cu hmuh chuah asi tiah theih asi.

Mah bantuk zawtnak hrik ruangah cun Tuluk ram minung hnacu thinphang tukin an um hna tiah theih asi. Aruang zong a liamcia mi 2002 le 2003 kum lioah Tuluk ram chungah le Hongkong khuapi chungah minung 650 tiang nih an rak thihpi mi SARs zawtnak hrik he pehtlaih nak an ngeih ruangah asi tiah theih asi.

Tuni tiangah cun minung 216 hna nihcun mah coronavirus zawtnak hrik cu an ngeih cang tiah theih asi. cun mah zawtnak hrik ruangah cun minung pali hna nih an thihpi cang tiah theih asi. Kan vawlei cung khua caan zoh lengmang tik ah hin thawngpang ttha theih awk a um kho hrim hrim ti lo.

Vawlei cung fimthiamnak a sang chin lengmang kanti ko nain cu fimthiamnak hmang in cun minung kan nunnak akan khamh kho hlei lo. Sibawi thiam sang sang le sii le ai ttha an ser chuah ko nain zawtnak ttihnung phun phun an chuak chin lengmang ve. Tu i Tuluk ram zawtnak chuakmi hi cu minung caah ttihnung taktak mi a si.

Leave a Reply

Your email address will not be published.