Tikhur An Thianh Nak Ah Minung Pathum An Nunnak A Liam

Kachinpyine, Pakhanh myone, Lungkhin hmun hma Saingya tihmi khua ah inn kam tikhur a hnomh tuk ruang ah June 11 zan suimilam 7:00pm ah khan minung pathum tikhur thianh ding in an luhnak ah oxygen an hmuh khawh tilo ruang ah an pathum ning tein an nunnak a liam tiah theih an si.

Minung pathum thihnak ahcun Lungkhin palik le khua mi cheukhat hna cu va kal in hlathlainak an va tuah hnu lawng ah a thi mi minung pathum hna cu fiang tein an min an theih khawh hna. A thi mi minung pathum hna i an min cu Maung San Aye kum 27, Paletwa mi U Kyaw Aung kum 34 le Paletwa Chinpyine um mi u Nay Win kum 35 hna an si.

An thih ning cu hi ti hin a si, Maung San Aye cu tikhur chung ah lut in hmunthur a thian cuahmah lio ahcun oxygen ahmuh khawh tilo ruangah thawchuah kho lo in a um caah U Kyaw Aung le U Nay Win nih chanh an timhnak ah an pathum ning tein an nunnak a liam tiah theih an si. An thih ning ah lunghrinh deuh a um caah Lungkhin palik nih sizung ah an ruak cu an kalpi hna.

Kawlram cu nilinh tuk ruang khuate lei an tithur tampi an reu ruang ah phaisa tampi phalh ding in tikhur athiantertu tampi an um. Nilinh tuk lio caan ah tikhur thuk tukmi ah an vun luh ah khin oxygen dop awk an ngeih tawn lo caah tikhur chung luhnak ah an thi timi thawngpang theih awk a um lengmang nak asi.