Thilmak Ngai Asi: Christmas Thingkung Cung Bak Ah Rul Pathum An Ni Ngerh

An post in munite tlawte chung lawng bak ah minung ting tamtuk nih an zoh manh mi Australia ram Melborn ah Christmas thingkung cung bak ah rul pathum dawh taktak in an ni ngerh mi hi a si. Mah rul an ni ngerh ning cu khuaruahhar ngai a sinak pakhat cu Christmas thingkung an ttamhmi bantuk in an ni ngerhmi khi a si.

Kan laimi antam taktaknak Melborn lam sir Christmas signboard an tarmi tung bak ah hri ngerh bantuk bak in an ni ngerhmi cu an hmu hi a si. Mah cucu online cung ah miphhat nih a post i a zohtu an tam kho taktak. Khuaruahhar ngai a si mi pakhat cu ahram khawk anni ngerhnak hmanh theih khawhlo tiang in anni ngerh tiah an chim.

Australia ram cu rul an tam taktaknak hmun le ram a si ko nain tubantuk rul thingkung ah aingerhmi hi kan vawikhat hmuhnak bak a si tiah a hmutu paoh nih cun comment an pek. Cheu khat nih cun rul taktak si lo in mipi khuaruahharnak ding ah an tuahmi a si tiah a chimtu zawng an um ve.

Hmanh sehlaw rullem silo in rul taktak bak an si tiah video athlatu pa Maxim nihcun rul taktak bak an si ko tiah fianternak atuah cawlh ve. Mahpa ni a chim tthan rihmi cu mah rul hna nih hin Christmas khuacaan asunlawinak le khuaruahhar a sinak an langhternak a si tiah a chim fawn.

Daily Mail nih a langhter ning ah cun mah rul hna hi azuattu pa nih Christmas dawhternak ding le mipi khuariahhartertu ding ah a tuahmi a si tiah an chim ve. Rul lei thiam sang hna nih an chim ning ah cun mah rul hna cu red-bellied black snake eastern brown snake tiger snake an si tiah an chim ve.