Sui Hlei Tial Ruak Vui le Laiphung

Laimi nih pipu chan in nihin tiang kan i fahsak bik mi cu “thihnak” a si. Aho nih hrial khawh mi le duh mi a si lo. Thih kan i fahsakning hi tutan kan farnu ruak hin a lang. Kan khua le ram a si lo mi Malaysia ram in kan Lairam ah lu i phum awk ah tlunpi a si.

 

 

 

 

 

 

 

 

A sullam cu, miphun dang ram ah lu i phum a duh lo tinak a si ko. Cu lungthin an ngeih mi hmaizahpiak lo in saram vui in vui ko cu lung a tha hrimhrim lo. Malaysia in mi phungkel vui lai ruahchannak he rak tlunpi a si cu mu. Thlachiat ruahnak a tlau. Lairam ah pei kan nunphung, kan zatlang nun a tlau fah deuh hi!

Pupa phung ah cun “thih ning zulh” in thlan an then tak ko. Tahchunhnak ah “sar thlan, misilo (thinghmui), pulthi, tbk., in an vui hna. Hiti ti tikah hlanmual an ngei tinak a si lo, thihning zulh in ruak vuinak an danmi kha chim duh mi a si.

Kan farnu Sui Hlei Tial ruak vuining zoh tikah hlan pipu chan, Laiphung tak vuining in sarthi le thinghmui vui in an vui. Thihhring in a thi mi (sarthi) le thinghmui cu pulthi vuinak ah vui an rak si lo tikah, hauleng ah vui an rak si.

A tawinak in chim ahcun, kan farnu hi COVID-19 ruangah a si nan ti ko nain nan palh deuh ko rua. A thihning cang fiangte in theih a si. Thla pangai, midang vuinak cio ah vui cu zawtnak a chawnh hna lai hei ti bang. Mithi nih mithi dang zawtnak chawnh hna lai hei ti bang (Zawtnak a ngei tinak a si lo). Cucaah ruak nan vuining zoh tikah, a bawnbok le mantaat khi a si ko.

Mizo kan unau cu a nung mi cu chim lo, mithi hmai an zoh. Cucu keimah hmuhtonmi chung in ka chim. Naite ah Delhi ah mi pakhat a thi i Kawlram tlunpi dingin tlunpi a si, sinain Kawlram chung luhpi a ngah lo caah Aizawl ah an vui. Aizawl ah phungning tein hawi sin ah an vui ko. Hihi minung phung ding cu a si.

Khrihfa phung chungah kan nung cang, Laiphung kan kaltak cang nan ti tung ah, ziah “Sui Hlei Tial” hi sarthi le thinghmui vui in nan vui kun? Sui Hlei Tial ruak nih zei dah a chuahpi ding nan tihmi a um? Mithi hawi sin vui a dawnkhantu zeidah si?

Thlanmual vui le atu nan vuinak hmun khi a nung mi caah zeidah ai dannak a um? Mithi nih mithi dang sin ah zawtnak chawnhbarh khawh a si timi ruahnak, zumhnak nan ngeih caah a si maw? Biahalnak a dong ding a si lo.

A donghnak ah: Khrih nih a kan tlanhnak ruangah, miphun thleidannak a um ti lo. Hlan zumhnak vialte zong a hrawh dih cang caah “pulthi, sarthi, thinghmui, pawpiphor” kan i khat dih. Hmunkhat ah vuiti ding le suanti ding. A thi cang ko ai phat ti’n uite le arte vui in vui ding a si lo. Carson Twintwin