Hi vawlei Pathian pennak ah hin zumtu kan si ko zongah taksa pum in sualnak kan tuah than lengmang a si ahcun lunglawmhnak le hngangamnak taktak kan hmu kho lai loh.
Zeicatiah cun Pathian nih a dawtmi a fale hna cu a chimhhrin tawn hna i fungfek zongin a tuk tawn hna ti kha kan hngalh. ( Hebru 12 : 7 ).Zumtu cu Jesuh Khrih vailam thisen ruangah kan thlarau nih zungzal nunnak vancung khua kha a co cang. ( Johan 1 : 16 / 5 : 24 ).
Asinain kan hngalh awk a simi cu zumhnak thawngin kan thlarau nih vancung khua a co cang caah kan duhduh in kan um awk a si hrimhrim loh timi biatak hi a si.
Zeicatiah cun Khrih kan zumhnak ruangah kan thlarau nih vancung khua co ko hmanh sehlaw taksa in sualnak kan tuah than lengmang a si ahcun hi vawlei amah Pathian pennak ah hin hngangamnak le lunglawmhnak taktak zong kan hmu kho lai loh. ( 1Korin 6 : 9 – 10 ) ( Galati 5 : 19 – 21 ) ( Efesa 5 : 3 – 7 ).
Cu lawng si loin kan chan zong a tawi fawn lai. ( 1Korin 10 : 5 ).Cucaahcun aho kan siah ti le Thlarau in hrinthannak kan hmuh hnu ah le thlarau in zungzal nunnak kan co kan ti hnu ah hin taksa in hi vawlei Pathian pennak ah lunglawmhnak le hngangamnak taktak hmuh a duhmi kan si ahcun hi vawlei sualnak hna hi kal tak khawh a herh.
Cu kan khal tak khawhnak dingah cun Jesuh Khrih min in Pathian sinah Bawmtu Thiang Thlarau hal zungzal kha kan herh fawn.Jesuh Khrih zong nih, “Atu tiang cu ka min in zeihmanh nan hal rih lo, hal u law cu nan hmuh hnga; cuticun nan i lawmhnak cu a tling lai,” tiah a kan ti. ( Johan 16 : 24 ).
Zumtu nih kan hngalh awk a simi Bible biatak aa hrawm khomi nan dihlak sinah Fimchimtu Thiang Thlarau um zungzal ko seh. Amen..Thank You For All, Johnly Fambawl