Ka pastor te pali lakah na duh cemmi i thim tiah ka hal hna sehlaw thim dingmi ka hngal lo. Ka caah a tling tuk i ka caah a thlum tukmi le kaa bochan tukmi hna cu ka pastor te hi an si.
Pastor lakah ngak ṭah hna nih pa can ah kan hman khawhmi hna, nu hmei hna nih pa can ah hman khawhmi, pa hmei hna nih nu le pa can ah hman khawhmi pastor ngeih hi a har tawn.
Cu hna lakah kan mitthli a hnawt tu, kan ngaihchiat ah kan inn a phan hmasa tu, kan i lawmh caan ah kan hlam hmasa khawhmi hna cu kan pastor te hi an si.
Thlarau lei lawng in paw a kan cawmtu an si lo, vawlei lei zongah a kan kilhtu an si. Vawlei cungah a tlingmi kan um lo. Tlin lonak tampi zong a ngei khomi kan pastor te hna hi, kan nih caah cun soisel awk um loin a kan kilhtu an si.
Pastor hi nan ngei kan ngei cio. Keimah ka pastor (VCBC) bantukin nan ngei ve a si ahcun mi thluachuak nan si tinak a si.
Anmah lawng khi a si lo. An nupile hrim hrim khi upat an tlak tuk. Pastor nupi kan hngalhmi lakah VCBC pastor kan nupi le khi ka hngalhmi an mak bik ka ti.
An nun a nem, an zia a ṭha, an nun aa dawh, an aw a nem, an hmai a panh. Kum 9 deng ka um chungah kan pastor te nupi chiatnak a chimmi ka tong rih lo. Cutluk cu upat an tlak ve.
Kei hi pastor te hi pastor hmuh in hmuh loin, pa le hmuh in a hmumi ka si. Ka lungtlin lonak ka ngaihchiatnak hi an hmai zah lo tein ka chimh ngam hna. Ka ti tawn hna.
Mah ahhin ngakchia fafa nih tiin biafak in ti le soisel ka tong bal lo. Zeitlukin saan a tlai lomi zong hi kan bia te an ngaih i an ka soisel bal lo. Nu hmei fa na si, zu ding na si, ngakchia na si, mi hrut na si tiin kan bia lakpiak lo in an um lo.
An tlamtlin lonak a tam ve ko lai. Asinain an i zuamnak cungah le an kan dawtnak hi an tlamtlin lonak a phenh dih. Cucaah kei ka pastor cu vawleipi hmai ah ka zahpi hna lo. Soisel awk ka hngal hna lo.
Ka duh ningin ka daw kho hna lo nain an hmaifang te ka hmuh hna bantuk ka hna a ka ngamtertu ka pastor te an si.