Jesuh Khrih kha hi vawlei a len lio ah khan,Pathian nih hi vawleicung misual mi hna khamhtu dingah a fapa ngeihchun a peek mi hna,a kan peek mi a si ti in an zumh khawhlo caah Pathian ka bia i ka zum a ti mi hna nih an leirawi i an tleih hnu ah rom ralkap hna sinah an chanh i vailamcung thihnak faak bik ah an thah.
Jesuh cu Vailamcung cun a ruak cu an tthumh hnu ah thlan ah an phum i a thihnak in nithum ni zingka te ah thihnak nih a tlaih khawh lo caah a mah nih a rak chim chung cang bantuk in a tho.Amen!Jesuh nih a zultu hna sin ahcun bia a cahtak hna,”Ka Pa sinah ka kal lai i bawmtu thiangthlarau kan hal piak hna lai i cu nih cun a zungzal in an umpi han lai,a ti.
Cun,a thawhthan ni in a ni sawmnganaak ni Pentecos ni ah rak ka hngak u tiah a zultu hna sinah a chimchung bantuk in a zultu hna le Khrih a zum mi pawl nih cun hngahhlang ngai in Thiangthlarau an sin i a rat lai cu an hngak,Jesuh nih a chimh chung mi hna bia cu an zumh i an zumh bantuk te in Pentecost ni ahcun Thiangthlarau a hngak mi zumtu hna cu lei pakhat cio nih cun a tongh cio hna caah holh phungdang in an holh.LAMKALTU 2 Thiang Thlarau A Rung Ṭum
1Pentekos ni kha a phak tikah zumtu vialte cu hmunkhat ah an i pum. 2Chikkhatte ah khin van in aw pakhat a rung i a thawng cu thlitu fak piin a hrangmi thawng bantuk a si i an ṭhutnak inn kha a khat dih. 3Cun meizik he aa lomi leiṭe an hung chuah kha an hmuh hna i cuka i a ummi hna an dihlak cungah khan lei cu pakhat cio ah an i fu.
4Annih cu Thiang Thlarau in an khat i Thlarau nih chim khawhnak a pek hna bantuk cio khan, holh dang in an holh.5Cun Jerusalem khua chungah vawleicung khuazakip in a rami Judah mi an um liote kha a si; cu hna cu biaknak lei i aa zuam ngaingaimi pawl kha an si. 6Cu thawng cu an theih tikah mi tampi an i pum.
A zummi hna an holh tikah khan midang aa pum vemi hna nih khan kanmah holh in an holh, tiin an rak theih cio tikah khan an khuaruah a har ngaingai. 7An lung a suk ngaingai hna i, “Hiti in bia a chimmi hna hi Galilee mi an si ko ṭung! 8Zeitindah kan i chuahkehpimi holh cio holh in kan dihlak in kan theih kun hna?
9Kannih cu Parthia ram hna, Media ram hna, Elam ram hna,Mesopotamia ram hna, Judea ram hna, Kappadosia ram hna, Pontas ram hna, Asia ram hna, 10Frizia ram hna, Pamfilia ram hna, Izipt ram hna le Libia ram chung i a ummi Sairin khua pawng ram hna in a rami kan si; cun a cheu cu Rom khua in a rami kan si,
11Judah mi kan si ah, Judah phun aa hrawmmi Jentail mi kan si ah, cun a cheu cu Krit tikulh le Arabia ram in a rami kan si fawn — asinain Pathian nih thil lianngan a tuahmi hna kha an chim tikah an chimmi cu kan holh in an chim tiin kan theih cio hna,” tiah an ti. 12Khuaruahhar le lung-ar in, “Mah hihi a sullam zeidah a si hnga?” tiah pakhat le pakhat an i hal lengmang.13Sihmanhsehlaw midang nih cun an nihsawh hna i, “Hi hna hi zu an ri,” tiah an ti hna.Peter Phungchimnak
14Khi tikah Peter cu lamkaltu hleikhat hna he khan a hung dir i, aw thang ngaiin a thawh hna i, “Ka phun hawi Judah mi hna le Jerusalem khua ah a ummi vialte hna, hiti in thil a hung ummi sullam hi zeidah a si tiah kan chimhmi hna hi ṭha tein ngai tuah u.
15Hi mi hna hi nannih nih nan ruahnak ah zu an ri, nan ti; cucu a si lo, zu an ri lo; atu cu zinglei suimilam pakua lawng pei a si ko rih hi. 16Zeidah a si deuh ti ahcun, Pathian nih profet Joel kaa in a rak chimmi kong kha a si. Zeitindah a ti tiah:
17‘Ni hmanung bik ah cun mi vialte kha ka Thlarau ka toih hna lai.Nan fapa hna le nan fanu hna nih bia an chim lai;Nan tlangval hna nih langhnak an hmuh lai i Nan tar hna nih mang an manh lai. 18Asi, ka salnu hna le ka salpa hna cung hmanh ah khan cu ni ah cun ka Thlarau kha ka bungh lai i bia an chim lai.
19Cunglei van ah khin khuaruahharmi thil ka tuah hna lai i Tanglei vawlei ah hin hmelchunhnak ka umter hna lai thisen le mei le a chahmi meikhu an si lai. 20Bawipa Ni, a sunglawimi ni le a liannganmi ni a phak hlanah khan Ni cu a mui lai i thlapa cu thisen bantukin a sen lai. 21Cu tikah Bawipa min a aumi paoh cu khamhnak an hmu lai,’ a ti.
22“Israel mi hna, hi ka bia hi ngai tuah u. Nazareth khuami Jesuh cu Pathian nih rian a fialmi a si ti kha, Pathian nih amah thawngin a tuahmi khuaruahharnak tehna, hmelchunhnak tehna le thil lianngan hna nih khan an langhter ko; hi ka chimmi hi nanmah hrimhrim nih nan hngalhmi an si, zeicahtiah nanmah lak hrimhrim ah a rak tuahmi thil an si.
23Pathian nih Jesuh cu nan sin i pek awkah khan a rak ruah ciami le a rak khiah ciami a si bangin nannih nih amah cu nan thah, misual mi hna kha amah cu vailamtahnak thing cungah thir in nan khenhter hna. 24Sihmanhsehlaw Pathian nih amah cu mithi hna sin khan a thawhter ṭhan, thihnak nih amah cu a tlaih peng khawhnak ding zeihmanh a um lo.
Hi ni thok hin Minung sinah Thiangthlarau cu Khrih a zumtu hna sinah a um i a tu kan chan tiangin Khrih a zumtu hna sin paoh ahcun a thi kho ti lo mi,Jesuh nih a pa sin i a kan halpiak mi Thiangthlarau zungzal nunnak cu kan sinah a um ve cang,Bawipa min thangthat si koseh.Amen!
Biahalnak:Hawidawt,Kan ca i a thi i a thotthan mi Khrih Jesuh nih a Pa sinah a kan hal piak mi zungzal nunnak Thiangthlarau cu nang na ngei ve cang maw?Bawipa nih kan dihlak caah thluachuah kan peek piak koseh.