NIHIN CAAH PATHIAN BIA; Lungthin hi zeizong vialte nak in a zer bik: Rev. Za Thio

Jeremiah 17:9; Lungthin hi zeizong vialte nak in a zer bik. Ahonihdah minung lungthin hi a hngalh khawh lai? Damh khawh ti lo tiang in a zaw cang. Pathian nih kan tuahmi sualnak le kan tuah lomi sualnak lawng a buaipi lo, kan lungthin zong a zoh.

Kan lenglei nak in kan lungput hi a buaipi i a ngiat deuh. Kan lungthin hi Bawipa nih a dah dih. Angaite tiah cun, kan tuahmi sualnak hna ai thoknak cu kan chunglei in asi. Tiva paoh cu tihna an ngei tawn. Cuve bang sualnak paohpaoh cu a hna an ngei ve i cucu kan lungthin hi asi (Mark 7:21). Kan lungthin kongah minung hi kan i lo dih.

Midawh le mi dawh lo hi a leng zohah kan i dang tuk nain kan chunglei cu kan i khat dih, kan i lo dih ko. Kan lung chung hi ruahnak tha lo lawngte i a khah hi Bawipa nih a hmuh ciami asi (Gen.6:5).

Jeremiah profet nih “Lungthin hi zeizong vialte nak in a zer bik,” atimi hi a dikmi asi(Jer.17:9).
Ahman tuk. Kan lungthin cu a zer khe ko.Kan duhmi kan duh loh kan ti i kan duh lomi hi kan duh ti kan hmang. Midang chim hlah, kan sahlawh koko hmanh kan hnahchuah hna.

Mifale tanghra kungthu panga an hmuh hna ah kan lung ai nuam lo. Kan innpa vokpi nih fa a hrin i pa hra leng hna a hrin le kan thin a va hung. Annih fanu kha mirumpa nih, asi loah, bawi pakhat nih a thit la ti kan theih hmanhah thlacam kan zuam lo i pumh hna kan nuar.

Cu hna chung nih thii ting thongkhat an pauh ti thawng theih hna ah kan kaa a thaw lo. Minung hi ahohmanh an tha tuk lai tiah ruat hna hlah, a thin ci hna hlah. Kan i khat dih ko. Thawngtha chim kan kalti lio ah Pu Rung Ceu ( Australia ah a um cang) nih aka chimh bal.

An khuapa nih tupi ah ram an riahnak ah vom nganpi a kah. Cu thawng an theih tikah an innpa, tarpa a thin a hung i, “Duh bak hlah, duh bak hlah,” tiah zapi theih in a au ati. Aruang cu a vom hnit hna a ngan tuk i thong 70 hna i a zuar ahcun an inn kha canphio a cih la ti a phang tuk ati.

Mah pa hi kan hei sawi men na hnga in a ngaite tiah cun kan si cio ko. Minung cu nahchuah kan hmang dih. Hiti lungthin a ngeimi kan si caah pei, khamhnak co kan herh cu. Asi lo le, hrinthan kan herhnak asi cu! Nithum chung dawtnak kong kan relmi in kan hngalh ko.

Ziah agape dawtnak kan ngeih khawh lo? Kan lungthin pei a zer tuk i a zaw fam cu. Mizaw nih zei rian cu dah an tuan khawh? Kannih zong Pathian nawlbia le a kan fialmi hi zeitindah zawt bu cun kan zulh khawh la le, a ngah lo. Damh khawh ti lo tiang in a zaw cangmi na lungthin le ka lungthin hi kanmahte in kan thlop in kan damh kho lo.

Vawlei sibawi thiam bik zong nih an damh kho lo. Cucaah pei Bawipa nih hitin atinak asi cu. Lungthin thar kan peek hna lai i thlarau thar nan chungah ka khumh lai. Nan pum chung in lung bantuk a hakmi nan lung kha ka lak lai i titsa bantuk in a nemmi lung kha kan pek hna lai.

Ka thlarau cu nan chungah ka khumh lai i ka nawlbia he ai tlak in kan um ter hna lai i ka phunglam zulh in nan nung lai,” (Ezek.36:27,28). Pathian kan dawt i midang kan dawt khawh hna nak hnga kan herh cemmi cu Thiang Thlarau co le Thlarau i kha hi asi ko ( Rom.8:9; Efes.5:18).

Paul nih Efesa khua zumtu hna a halmi hna bia in donghter ning. ” Nan zumh ah khan Thiang Thlarau nan rak hmu maw?” (Lam.19:2). Kan lungthin a zer tuk i a zaw cangmi damter tu cu Jehovah lawng asi i a damternak i a hmanmi si cu Thiang Thlarau hi asi. Bawipa nih thluachuah kan pek piak ko seh. Credit: Za Thio