Motor Accident Nak Ruang Ah Nu Pathum An Nunnak A Liam

Naupawi Lio Nu Pakhat Sii-inn Lei An Kalpi Lioah Motor Ai Let I Nu Pathum An Nunnak A Liam. Mandalay ramṭhen, Nyaung U peng, Nyaung U-Kyauk Pan Taung(ကျောက်ပန်းတောင်း) lam ah nizan November 23 chun sml 12:30 hrawngah chungkhar pakhat nih citmi motor pakhat ai leh caah mi bawmchantu phu nih an bawmh hna, tiah theih a si.

“Cu motor cu naupawi lio nu pakhat sii-inn ah a kalpitu a si i Nyaung U-Kyauk Pan Taung lampi metung 17/5 an phak ah rang tuk in a khalh ruangah ai let i nu pathum an nunnak a liam, naupawi lio nu cu a him,” tiah mi bawmchantu phu in ṭuanvo ngeitu pakhat nih a chim. Motor ai citmi hi nu pali le pa pakhat an si i cu chungah pa pakhat le naupawi lio nu lawng an him, asinain hliamhma belte an pu, tiah theih a si.

Relchap- နဂါးညီနောင် Guerrilla Phu Sakhaan Cu An Luh Hnawh Hna I 2 An Thah Hna. Magway ramthen,Pakokku ah a um mi နဂါးညီနောင် Guerilla phu i an sakhaan cu nizaan November 23 zaanlei sml 3 hrawng ah SAC rallamsial ralkap nih an luh hnawh hna tiah နဂါးညီနောင် Guerilla phu hruaitu sinin theih a si.

Pauk le Myaing lei ah mipi vengtu phu le SAC ralkap kar kahdohnak a dih hnu ah thazaang 80 hrawng a si mi SAC rallamsial ralkap nih နဂါးညီနောင် PDF sakhaan lei ah an luh hnawh hna i ralvengtu 2 cu an tlaih hna tiah a chim. “Nizaan ah SAC ralkap an rak ra ti kan theih bak ah ralvengtu a si mi Phoe Lone le Chitte cu ral tha tein ven ding in phone kan chawnh hna ah phone an tlai ti lo.

Thawng kan theih hin cun a hnu cang.A dang ralvengtu nih an va zoh hna tik ah sakhaan cu mei an khangh i ralvengtu 2 cu an rak tlaih cang hna.Tuzing ah Phoe Lone i a phone in kan thah cang hna tiah SAC ralkap nih an kan chawnh” tiah နဂါးညီနောင် Guerilla phu hruaitu Bo Painggyi nih a chim.

“Hriamnam thazaang kan i khah lo caah va doh than awk a tha lo.An tlaih mi hna 2 hi SAC ralkap nih sakhaan an piah ter hna i sakhaan 3 cu mei an khangh” tiah a chim. An nunnak a liam mi 2 hna hi SAC ralkap nih nizaan ah an tlaih hna i tuzing ah an thah hna.Phoe Lone le Chitte hi kum 21 lawng an si rih tiah theih a si.Crd:CBN DN