Minung Kan Ngandam Nak Caah Kawm Sam Tthat Nak

Lai mi nih kan techin fapar chan tiang zawng ah kan hlawt awk le kal tak awk a ttha bak lo mi eidin cu kawm khi a si. Kawm cu hlan lio kan pi pu hna chan in si she, nihin kan chan tiang ah a cutzat caan apoah Laimi nih kan duh taktak mi tirawl phun khat asi.

Kawm cu phun tampi in ei khawh mi asi, a duhmi nihcun buh he an kalh chih I mah ti cun an ei. Cheukhat nihcun bel nganpi an cuar rawl tiang ah ai rinh mi tampi an um. Cu lawng hlah cheukhat nihcun mei ah an rawh I mah ti cun a ei mi zawng tampi an um fawn.

Tutan I ka vun langhter duh cem mi cu a mah kawm rawh khi si lo in a sam khi minung kan ngandamnak caah zeitluk in dah a rak tthat timi tu khi a si. Tu lio caan te hi Kawm rawh a cutzat lio caan a si caah na rawh, ka chumh tik ah a sam notete khi va thian duh hlah minung kan ngandamnak caah a ttha tuk mi asi.

Zei caah dah a tthat ti ahcun zun lam ah zawtnak rungrul lut ding mi vialte kha fawi tein a rak kilven khawh ti si. Cu lawng hlah zunsip nih an ei lengmang mi ca tiang khin a damter khawh. Kal fah zawtnak a chuahter ding mi tiang khin a kilven khawh fawn.

Kawm sam na ei nak thawng in zeidah tthathnemnak a chuah pi rih ti ahcun zun bawm kha a thiamter caah zunsip ei ti bantuk vialte kha a ven khawh. Ttha tein na zun na zun khawh tawn lo sual ahcun kawm na ei tik ah a mah kawm long si lo in a sam no mi tiang khin rak ei chih cang.

Kawm sam ah khin vitamine K ai tel chih caah thisen ningcang lo I a um ding mi vialte normal tein a um ter khawh. Cun zunthlum zawtnak a nei mi hna ca zong ah a ttha taktak mi sii phun khat asi. China meh chuan thiam tak mi nungak zawng nih kawm sam notete thatbere he a ei tawn kha nan hmuh ttheu lai. A ruah awk kan rak theih loh caah a si. Minung kan ngandamnak caah bawmchantu taktak a rak si.