Lungdohnak phen ah Ruahchannak Petu

Nihin kan vawlei kan zoh tikah mi tampi cu lungdonghnak thlankhur chungah kan pil cuahmah. Lungdonghnak nih kan chunmang a kan thlauter, mi dang lungfahternak a chuahter i, Pathian nih a kan tinhpiakmi hmu kho lo in a kan tuah, a donghnak ah cun thihnak lawng icit in kan nun kan liamter.

Lungdonghnak hi a um taktak ko, cun a fah zong a fahtuk i kan sining lo piin a kan chiatu a si taktak. Amah belte hihi kan philh lo ding mi a si – Lung donghnak cu Pathian sin in a rami a si bel lo, kan ral a simi Satan pa sin in a ra ti hi kan theih dingah chim ṭhan ka duh (James 1:13-15). Kan ral pa nih cun kan lungdonghnak chungah taanter, Pathian nih a kan pekmi caan ṭha hna kha hmang kho lo in kan thinlung kha uk i hrawh a duh zungzal.

 

 

 

 

 

 

Asinain Pathian tu nih cun, na lungdonghnak hmun ahkhan chiahtak le kaltak siloin, hmailei ah khin nun nuamhnak a um hi, na hman ciami caan hna nakin na hmailei i na caan hna hi a sunglawi deuh hi. Keimah hi ka zum law ka bochan ko, tiah a kan sawm peng. Salm 32:8 nakah, “na zulh awk hnga lam kha kan hmuhsah lai, kan cawnpiak lai i lungthin kan cheuh lai,” tiah a kan ti.

Cucaah Pathian cu zum law i bochan ṭhan ko, na lungdonghnak hmun in an hruai khotu le an chuah khou cu amah lawng a si. Ruahchannak thar an pek lai. Amen. Lungdonghnak cu kan kaltak dingmi hmun a si i zungzal kan umnak ding hmun a si bel fawn lo.

Paul nih Filipi khuami Khrihfabu hna sinah hitihin thazang peknak bia a chimh hna, “Pathian tinhmi kha nan zulh khawh nakhnga le cu tuah duhnak lungthin nan ngeih khawh nakhnga, Pathian cu nan chungah rian a ṭuan zungzal ko tiah a ti.”

Pathian vel kha Kan lungdonghnak hmun: ṭihnak, thinphannak le lungzawtnak ah kaltak ta siloin, Khrih kan zumhnak le kan ibochannak thawngin hmailei ah hin niceu dawh a um ko, tiah ruahchannak a ngeimi kan si hi a biapi tuk. Cucaah ka u le ka nau hna, Pathian nih an thimnak hna le an kawhnak hna cu nan chungah fehter chichin ko u, cu ti nan tuah ahcun nan tlu bel lai lo (IIPet.1:10).

“Țhawng ulaw, nan ral ṭha ko u, ṭih hlah u, an hmaiah therphang hlah u; zeicatiah nanmah he a kalmi cu Bawipa nan Pathian a si; an deuh hna lai lo i an hlaw fawn hna lai lo” (Deut.31:6) Bawipa nih daihnak le hnangamnak he lam in hruai ko hna seh. Credit: Ram Ceu

You cannot copy content of this page