Lashio Myo Makyinuh An Tihmi Thlanmual Kam Ah Nu Pahnih An Ruak In An Char Hna

Shan state nichuah lei kam Lashio myone Makyinuh an tihmi khuate thlanmual kam ah nu pahnih hri nih anrak ttawn dihmi cu an ruak in an char hna tiah theih a si. Makyinuh an timi khua mawtaw lam in suimilam pakhat tluk hrawng ah khin kuarsaduk pakhat arak um i mah ak ahcun an pahnih tein cun hri in anrak ttawn dih hna cu an va hmuh hna hi a si.

Ruak an char mi nu pahnih hna cu kum 30 minung veve hrawng khi an si tiah rual va hmutu nihcun an chim. An kut hnunglei ah anrak khuaikhirh hna i hri in anrak ttawn hna i mah cun an ruak in an va hmuh hna hi a si. Pakhat deuh cu a hmai lei khin arak i ttawn tiah theih a si.

An ruak va hmutu hna nih an zumh ning ahcun a thattu nih hin anpahnih tein cawl kho lo ding ttawn dih i mah hnu ahcun an ruak mei nih khangh a timh hna le si la taih zumhnak an ngei. A ruang cu an hmuh ning le an ruak arak tuahto ning an zoh dih hnu ah mah bia hi an chim nak a si.

Mah hna pahnih ruak an char mi cu antakpum cung ah hliamhma pakhat te hmanh hmuh awk a um lo tiah miharsa hna bawmtu phu hna nihcun an chim. An ruak kam ahcun mawtaw hnunglei ah an benhmi number pakhat cu an hmuh tiah theih a si fawn.

Khualum tuk lio a si cang caah an pahnih tein anruak cu arak thu ngai cang tiah an chim. An ruak cu thopaw nih anrak bomh dih cikcek tiah Kunazungi an timi pa nih cun a chim. An pahnih tein cun Lashio mino phu hna nihcun an mawtaw in an phurh hna i Lashio sizungah an kalpi hna.

You cannot copy content of this page