KHAMHNÂK A TLAU KHO TIAH AN TIMI HI KHAMHNÂK A TLAU KHAWH RUANGAH SI LOIN KHAMHNÂK KONG AH AN ZUMHNING AI PALH CAAH A SI

Zeicatiah Lairam zûmtu kan pa le hna nih kan nunchungah khamh i hngalh khawh a si lo. Kan thih hnu ah kan tuahmi țhatnâk le kan tuahmi țhatlonâk kha biaceihnâk ni ah cuai ah an thlai te lai i țhatnâk kan tuahmi nih a lerh deuh a si le van kai, țhatlonâk kan tuahmi nih a lerh deuh a si le hell kal, timi hi khamhnâk kongah Laimi zumhning le i cawnpiakning a si caah khamhnâk hmu dingin i forh le i zuam a si.

No photo description available.

Hi zumhning le cawnpiaknâk nih Laimi zûmtu khuaruahnâk le nunning a hlanh dih caah nun chungah Khamhnâk i hngalh khawh a si tiah chim hram ka rak thawk ah hin Lai Balbal Thiang a kan lehpiaktu mithi kan pa nih ‘khamhhngalh cu ninghngal a si’ tiah a rak ti.

Cucaah Khamhnâk kongah Laimi zumhning (Doctrine of Salvation) cu: Țhatnâk tuah khawh le khamhnâk hmuh, Țhatnâk tuah khawh lo le khamhnâk sungh timi a si caah ni hin tiangin:

Sualnâk tuah le khamh tlau, Țhatnâk tuah le khamh tlau lo, tiah kan ti thai nâk hi a si. Khamhnâk cu Khamhtu Jesuh nih vailam ah a nunnâk pe in a lîm hnu ah man loin minung sinah a pek.

Cu thawngțha cu mi nih a hna in a theih i a lungthin in a zumh tik ah: Thiang Thlarau nih cu zûmtu cu hmel a chunh i khamhmi Pathian fa, van rocotu a sinâk kha a hngalhter i cu zûmtu cu Khamhmi a si. Efesa 1:13.Rom. 8:16.

Minung tuahsernâk hi samzai ngaw hmanh ai tel lo. Minung cu Jesuh tuah cia mi Khamhnâk zumhnâk in a cotu ceu a si. Zumhnâk in khamhnâk ka co hnu ah Pathian Biatak Baibal le Thiang Thlarau bomhnâk thawngin ka tuahmi țhatnâk nih zumhnâk in ka comi khamhnâk kha samzai ngaw hmanh a chap mi a um lo bangin:

Baibal biatak zul lo le Thiang Thlarau lam hruainâk zul loin tukforhnâk tei dingin ralrinnâk ka ngeih lo ruangah sualnâk ka tuah mi nih zumhnâk in ka comi khamhnâk kha samzai ngaw hmanh a zawrter hlei lo.

Cu ti a si ahcun khamhnâk co hnu ah cun sualnâk tuah zongah a poi ti lo tinâk a si maw? A si hrim hrim lo. Khamhtu Pathian nawl kha ka ngaih i a duhning in ka nun ah cun Khamhtu Pathian nih a ka dawt chin chin lai i kan i hawikomhnâk kha a fek chin chin lai.

Asinain Khamhtu Pathian nawl kha ngai lo in pumsa duhnâk ah ka nun i sualnâk ka tuah ah cun Khamhtu Pathian nih a ka chimh hrin lai i kan i hawikomhnâk kha a rawk lai, ti hi: Zeitilei hmanh in thlennawn khawh lomi Baibal biatak, zungzal in a hmunmi thil sining a si.

Laimi zûmtu kan pa le tampi nih an i palh ngai ngai mi fiang tein ka hmuh mi cu: Biakam Thar Baibal chungah, a hlei khun in Paul cakuat mi ah Paul nih zumhnâk in khamhnâk a co cangmi zûmtu hna kha țhat lonâk a phun kip hrial ding le țhatnâk a phunkip tuah dingin forhfialnâk a ngeih mi khi:-

Khamhnâk hmuhnâk ding forhfialnâk ah an ruah. Cucaah Camping Crusade kan ngeihnâk kip ah hi biatlâng hi ka târ piak tawn hna. “Țhatnâk tuah ruangah khamhmi kan si lo i Țhatnâk tuah dingah khamhmi kan si”

Cuticun:- Sualnâk tuah ruangah khamhnâk a tlau i țhatnâk tuah ruangah khamhnâk a tlau lo a si ah cun: Man loin pekmi khamhnâk hi zumhnâk in co a si lai lo i tuahsernâk in co a si lai caah Biakam thar cawnpiaknâk in lam a pial cang tinâk a si lai. Crd: Evan Rualuk