Simai Paw cu tihni kha tuan ngai in class a phan, kei ka um he ai tong i ka chawnh — a holh ngam tuk lo. Hiti zoh ahcun hla sak a thiam ding khi a lo lem lo, zapi hmai a chuak ngam lo ding khi a lo.
Class ah cun a holh ngam deuhmi top 30 hna cu Sayama Phoebe nih pakhat hnu hla a sakter hna, 28 cu an vun dih. Suimilam 3 leng kan thu cang hna, kan ba, kan pawtam pah cio. A donghnak cu Simai Paw caan a si.
Ningzah pang nawn khin a vun dir, second 5 hrawng a vun sak ah kan dihlak kan dai cikcek. Minute 1 hrawng a vun sak ah khin cun kei cu ka khuasiksem a chuak. Laiholh a thei lomi Kachin pa kan director ka pawng ara i ‘အရမ်းမိုက်တယ်နော ဆရာ’ aka ti ve. Aw dawh hi a power arak pin hringhran hi teh ka ti.
Saya Sangpi te biakinn bantuk ah i pumh, dir buin Pathian hla vun sak, a vun mui pah, a turu bakmi sound system nih kan taksa a hninh, pawngkam ah kut thlir in mitthli he thla a cammi vun hmuh pah, colour tling lighting pum tete nih kan lu an vun kan kah chap ah khin cun Pathian he direct kan i chawn cang rua ti tluk khin thinlung a um.
Hibantuk lighting dawh, LED screen nganpi, music band tling le taksa tiang a hninh khomi sound system hna hi mino nih an uar timi cu Saya Sangpi, David Lah, Susana Min le Joshua Aye te pawl nih fiang tein an pemh. Hi instruments hna hmang in mino tampi Pathian lei an kirpi khawh hna.
A ngaingai ti ahcun mah instruments hna hi nightclub le bar ngeitu hna nih mino hrawhnak caah an hman theumi a si. Nain, mino hna Pathian he an i naih deuhnak ding caah mer in hman khawh ve ahcun a tha tuk ko cu ta tiah kei nih cun ka ruah. Vuak thiamnak zong chan tiluan dawi kholo nih cun midang fahnak pek ding ca menmen ah an hman, nain Aung La te pawl nih cun pawcawm nak le zapi nuamhter nak ding caah an hman ve.
Meeting kai menmen a lomi biakinn pumh nih mino lungthin a hninh kho ti lo, mino he upa he ngutnak menmen a si. Laimi khrihfabu vialte zong nih chan ti luan kan dawi pah ve a hau cang men lai, culo cun kan mino vialte Saya Sangpi le Susana Min te pawl sin an lut viar te laiSLTT