Bago Ramṭhen, Nyaunglebin Peng Ni 5 Chung Kahdohnak Ah SAC Ralkap 50 Leng An Thi. Bago ramṭhen, Nyaunglebin peng Pazunmyaung khua kahdohnak ah SAC ralkap tam ngai an thi i hliamhma pu mi zong an tam, tiah PDF ralkap pakhat nih Khit Thit Media ah a chim.
September 27 zing suimilam 10:00 hrawngah SAC ralkap cu rallam an sial i palik, pyusawhti le meithat phu hna cu hmai ah an kalter hna. Cu lio ah cun kan kah hna i September 29 zan tiang kahdohnak a chuak.
Kahdohnak ah SAC ralkap 50 hrawng an thi i 20 hrawng hliamhma an pu. Military region zung nih kahdohnak kong an kan thanhter duh rih lo, tiah PDF ralkap pakhat nih a chim.
SAC ralkap pawl cu Spring Warriors Column le PDF Battalion 3702 hna i bawm in an kah hna i PDF lei in ralkap 3 hliamhma an pu.
Cycle pahnih, walkie talkie 1 an sung ve, tiah theih a si. SAC ralkap nih phungki pakhat le tualchung mi pahnih zong zohchia ngai in an thah hna i tualchung mi hna innlo zong an khangh.
October 1 zing suimilam 11:00 hrawng in zanlei 5:00 tiang kahdohnak a chuak ṭhan i SAC ralkap ruak pakhat le meithal zun khat PDF nih an laak.
Vawlei cawhnak seh ngan pakhat zong an khangh, kahdohnak ah SAC ralkap 15 hrawng an thih pinah 10 hrawng hliamhma an pu, tiah Spring Warriors Column nih an thanh. The Chin Post