Kawlram cu tazacuainak atuah konain amah nih nuhrin covo buarnak arak tuah tukmi Gambia ram

Gambia ram cu Africa nitlaklei ram fate pakhat asi. An ram kauhning zong hi mel 4100 bial telawng asi. An ram cu kawlram chungi ramthen hnalakah ahmebik Kaya ramthen nak hmanhin ahme deuhmi ram asi. An ram ahmet tuk lawng siloin ramchung minung hmanh hi an dihlakah minung tingkul hmanh an silo.

Kawlram he cun ahlat tuknak ah aum mi ram pakhat asi pinah zeilei hmanhah pehtlaihnak angeilomi ram asi. Gambia ram le kawlram hna nih cun ilawhnak pakhat te an rak ngei, mahcu cu Gambia ram cu British nih a uk hna hnu ah kawlram bantukin ralkap kuttangah kum tam nawn arak um tawntu ram asi.

Gambia ram nih hin kum can saupi nuhrin covo buarnak arak tuah bal cang. Mah nuhrin covo buarnak hna vialte tucu an President hlun Yahya Jammeh tuahmi arak si. Yahya Jammeh nih nuhrin covo arak buarnak vialte hna cu arak tamtuk lawm mam. President hlun Jammeh nih cun 1994 kum in 2016 tiangin President sinak in arak uk hna.

Jammeh arak uklio hna ah hin ralkap bawi dirhmun le sinak vialte cu arak lak dih hnuah can saupi auk khawhnak hna dingah upadi cu arak ser. Jammeh nih arak uk hnalio ah hin nuhrin covo buarnak tampi atuah ko nain mitampi theih asi pengmi pakhat cu kum 2004 lioah khan Journalist pakhat cu arak rawii athahnak kha asi.

2005 kum lio zongah khan athialkam tawnmi misawsawh hna minung 56 hnacu ralhrang tiah apuh hna hnuah arak than viar hna. Mahlawng siloin America rammi sinak ngeitu Gambia chawletthaltu pahnih hna zongcu athah hna lawng siloin an ruak cu arak can dih hna. Cupinah amah eptu politician hna le thawnglatu tampi hna cu arak hremtuk hna pinah nu zatampi hna kawlin arak tlaihhrem timi zong theihcio asi.

Mah tlukin sualnak le nuhrin covo buarnak arak tuahtu le kawlram he lamhlatpiah aummmi ram lawng siloin arak hnimhnaih ballomi Gambia ram nih cun kawram cu miphun tenau hna cihmih timi sualpuhnak he taza acuai hi asi. An ram caah dah zei thatnak dah achuahpi lai. Siloah midang forhfialnak nih maw an tuahmi asi timi zong ruah phu asilai.