Kan tihmi nak in kan zumhnak ngan deuh a herh lio caan a si

Atu lio caan te hi kan zumhnak thawnter le ngantet a herh lio caan si. Cu lo ah cun sualnak le thihnak chung ah luh a fawi te. Zawtnak ruangah biakinn tiang khar in i pumh kho lo dirhmun kan phan hi hnu hmailei zong ah zei a tlung rih lai chim khawh si lo.

Vawlei pulrai nih kan nun a den. Cucaah hi vawlei pulrai chung kan tluk lo nak ding ah cun kan zumhnak thawn ter a herh. Peter nih Jesuh a zoh chung cu Jesuh bantuk tein Ti cung ah a kal kho ve . Sinain a pawngkam thlichia le tilet tlungmi a zoh ciammam cu Ti chung ah a tla ai.

Peter nih Jesuh a zumhnak le bochanmi nak in a pawng thlichia le tilet tlungmi a tihnak a ngan deuh ruang ah Ti chung ah a tla. Peter nih Ti chung ka tla cang ti a theih tikah Bawipa ka khamh tuah tiah Jesuh cu a au (tah) hnawh hmakhat teah Jesuh nih a kut a chanh i lawng chung ah dai tein an lut (Matt 14:22-32).

 

Nihin kan tonmi pulrai ruangah minung simi poh kan thinphang dih cio. Kan mawh lo Zeica tiah khamhnak sii a um lo. Sinain kan thinphanmi nak in kan zumhnak ngan deuh seh. Cucu zumtu nun cu a si. Harnak lak ah zumtu nun cu a sungmi a si bal lo.

Peter bantuk in hi pulrai lawng hi zoh i tih sual si cun pulrai chung ah kan tlu taktak kho ve aruang kan umnak hmun ah a um dih minung kan si ve caah i ku a fawi te. Sihmanhsehlaw kan thinphannak le kan tihmi nak in Jesuh kan zumhnak a ngan deuh ah cun hi pulrai hin kan luat hrimhrim ko lai zeicahtiah kannih cu Khrih thawng in a luatmi kan si cang(Gal 5:1).

Kan sin ah zeizing vialte tuah khotu Jesuh a um. Amah thawng in kan him lai timi zumhnak he Amah kan zoh si cun kan luat ko lai. Credit: Tluangceu Thang