Kalaymyo In Laitlang Lei Ah Akaimi Kungka (Motor) Ailet I Lam Tlang Ah Atla Driver Nunnak Aliam

Hakha le Kalay lam, Ramthlo le Dokthek karlak ah kehra ngei motor cu January 9 zinglei suimilaam 2:00 hrawng ah lamthlang ah a tla i a khaaltu (mawngtu) a thi tiah thawng kan theih.

“Aa let mi motor hi, Kungka No. SGG 2C-4435 kehra ngei Zu a phur mi a si. Motor a tlak hi 2020 January 9, zinglei suimilam 2:00 am hrawng ah a si. Kalay in Hakha lei a rak kai i Ramthlo khua in Dokthek lei furlong 6 hrawng ah a thlaknak hi a si,” tiah Ramthlo Khuabawi Pu Thang Luai nih The Hakha Post ah a chim.

Hi motor tlaknak kong he pehtlai in Pu Khup Suan Pau nih, “A thi mi cu Khai Thawn Thang (kum 25) fa pahnih a ngei mi a si. A ruak zong an tlunpi cang. Cun, a zuultu Pum Sian Mung (kum 22) tu cu a ke kiak, a hmai aa khawn i Hakha Sii-inn ah an zohkhenh lio a si.

Zeihmanh thinphan awk a um lo, a dam ko lai. Motor aa cit mi hi, driver le a zuultu lawng an si i, Tedim khuami Kalay khuasa an si. An tlaknak hi lam in pee 300 tluk a cheng. A tlaknak a ruang cu lamkuaih zawn a si ca ah fiang tein kan thei kho lo,” tiah The Hakha Post ah a chim.

Hakha Pehtleihnak Zung ah a tuan mi Pu Zam Sian Mang le Pi Iang Rem te motor a si i, motor a tla mi hi voi dang zong ah Zu a phur tawn mi a si. Hakha khuachung Zudawr zuar ding ca ah a si, tiah kan theih.

Photo: Pu Thang Luai

The Hakha Post