Indonesia ram ah Mask man cu sui man nak hmanh in man a fak deuh

Kan vawleipi lungrethi taktak in atuahtu Wuhan virus nih nikhat hnu nikhat in vawleicung ram tampi a phan cuahmah. Corona virus a damter khoru sii an hmuh cang tiah thawngpang rak thang mi kha cu hman dawh a si lo. Aruang cu corona virus ruangah a thi mi an karh chin lengmang caah a si.

Corona virus thlopbul nak ding sii cu an hmuh khawh rihlo caah a ven nak lam um chun pakhat cu mask in kan hnar tuam piak kha a si. Singapore ram ahcun an ram chung mipi dihlak in mask an ngeih khawhnak ding ah an ralkap hna nih million tampi an ser piak hna lio ah Indinesia ram ah cun mask pakhat te man khi sui man nak hmanh in a fak deuh tiah theih a si.

The Staraits Times thawngzamh nih anlanghter ning ahcun Indonesia ram ahcun mask cawk awk a har tuk caah mask pakhat man ah cun Indonesia phaisa in Rupe 14 ting le thong sawmkua a phan cang tiah theih a si. Kawlram phaisa in cun mask pakhat man ah ting khat le thong sawmruk tluk hrawng a si.

Mask manh cu tudirhmun in cun sui grame khat man nak hmanh in mask pakhat man a fak deuh tiah theih a si. Indonesia ram Cukata ah a ummi sii a zuar mi hna nih mask N95 3M thohkhat ah 20 ummi cu Indonesia phaisa in 1.5million in an zuar tiah theih a si. Sui man cu grame pakhat ah ting 800,000 tluk hrawng asi.

Tu tiang dirhmun ah cun Indonesia ram ah corona virus pakhat te hmanh a um rihlo caah mi zei paoh nih an kai lo nak ding ah a biapi cemmi mask cu a man a fah khunnak le a sunglawi khunnak a si. Ram tampi ah cun an ram mipi nih man ngeilo tein an ngeih khawh nak ding ah heh tiah an phawt hna lio ah Indonesia ram ahcun fee pek cu chim lo sui man nak hmanh in a fak deuh tiah theih a si.