Chin ramkulh, Hakha le Thantlang kar Timit kuanghrawn ah SAC ralkap le Chin ralkap hna cu zarh khat tluk fak ngai in an i kap. Cu kahdohnak ah cun SAC ralkap 20 hrawng an thi i 40 leng hliamhma an tuar, tiah CNF/CNA in chimnak nawlngeitu Salai Htet Ni nih a chim.
“Tutan kahdohnak July 3 in 8 tiang ah kanmah lei in 6 hliamhma an tuar, SAC lei ralkap 20 leng hrilh an si i, ralkap 42 hi siizung ah an phan tiah kan theih. Kahdohnak hmun in hnu an tolh, Hakha an phanh le phanh lo cu kan hngal lo” tiah Salai Htet Ni nih cun a chim.
May thla dih thawk ah Hakha in Thantlang lei ah SAC ralkap pawl cu rallam an sial i, July thla thawk in cawlcanghnak an thawk ṭhan caah kahdohnak a chuak. Hakha um SAC ralkap nih hriamngan in kah an bawmh hna pinah ral tuknak vanlawng in voi thum bomb an thlakhnawh hna, tiah theih a si.
Hakha in Thantlang lei ah battalion phu 5 in hmun khat ah ralkap thazaang 150 hrawng i ṭhen in hmun hnih ah rallam an sial. Kahdohnak ah SAC lei fak ngai in hliamh an si caah, Hakha um SAC ralkap hna cu bawmtu ding ah an thlahchap hna tiah theih a si.
Kahdohnak ah Chin ralkap nih meithal 4, kuanfang zun 1000 leng kan lak i, hmun hnih in rallam a sial mi SAC ralkap hna cu fak ngai in hliamh an ton caah phu khat ah i fon in hnu an tolh, tiah CNA in chimphuannak nawlngeitu nih a chim.
“SAC ralkap nih rallam an sial hi an khanghcia mi khua Thantlang hrambunh SAC ralkap sakhan ah ralkap thazaang chap an duh caah a si. Thazaang an i chap hnu ah hmunhma laak khawh an duh i cu caah atu bantuk in operations an tuahnak hi a si,” tiah Salai Htet Ni nih cun a chim chap.The Chin Post