Central Lairam, Lawngtlai 2023 Chiapa 19: ” Young Lai Association Sub-Headquarters : Sangau Executive Committee nih nawlngeihnak an kan pek bantuk in, Sangau Town Branch YLA (Sangau-I, Sangau-II, Sangau-III, Sangau-IV, Ramhlun) Committee nih cun Ritkhawhthil le Rithaisii le thil ṭha lo lak in kan khuatlang le ram a thian khawh nakhnga Sangau YLA Sub-Hqrs pengchung khuakip caah “Sub-Headquarters Ritkhawhthil Doh Pawl (SRDP)” cu a thar in a hun dirh ṭhan i; Hi Sub-Headquarters Ritkhawhthil Doh Pawl (SRDP) chungtel minung hna hi Sangau Town chung Branch YLA panga chung in thim an si”.
”SRDP nih hin Young Lai Association Sub-Headquarters : Sangau pengchung khua – Sangau-I, Sangau-II, Sangau-III, Sangau-IV, Ramhlun, Pangkhua, Sentetfiang, Thaltlang, Ceural, Rawlbuk, Lungtian, Varṭek, Varṭekkai paohpaoh ah cun Rithaisii le Ritkhawhthil le Thilṭha lo check hlai le tlaihkhih kong ah nawlngeihnak an ngei lai. SRDP dirh a si ka thawk in Check hlainak zong kalpi colh a si i, atu zarhhnih khat chung hin Sangau khuachung ah Ritkhawhthil tlaihmi le hremmi zong an um pah len cang”.
”SRDP nih hin an si khawh tawk in Ritkhawhthil tlaihkhih le check hlai kong ah fakpi in hma a lak peng lai i, cucaah pumpak nih maw bu nih harnak pek hraam lo ding in mizapi kan in nawl hna. Cupin ah kan rianṭuannak kong ah mizapi nih rak kan hnatlakpi hram ding in le a herhning in ruahnak le thazaang pek in bawmchanh ding zong kan in nawl fawn hna”.
”Sub-Headquarters Ritkhawhthil Doh Pawl (SRDP) nih khuatlang le ram ca rian an ṭuannak ah zapi lei in harnak rak tuahpiakmi maw nawlngai lomi kan um a si ahcun YLA Sub-Hqrs:Sangau nih a fak khawhchung in an chung action a lak ve hna lai.Kan khuatlang rawk cuahmah liomi hi nangmah le keimah nih kan remh ṭhan khawh rih a si ti hngal in ṭhahnem santlai si cio ding mizapi kan in sawm hna” tiah YLA- Sub Headquarter Sangau nih cathanh an chuah.The Lairam Times