Ṭeekri le thlichia lakah Pathian zumhtlak a sinak | God’s Great Faithfulness in the Midst of Thunders and Storms. Zumhtlak na si maw? Zumhtlak ka si ve maw? Vawleicung miphun vialte lakah Kawlram mi zumhtlak lo cem kan si.
Cu Kawrammi pawl lak hmanh ah cun, Laimi ko hi zumhtlak minung a um lomi miphun kan si, na ti hrim khawh men. Ram siifak Kawlram i a siifak bikmi miphun lakah cun si dawh a si.
A si reeng ko. Zumh tlak ka si bak lo. Na si ve hlei lo, ka careltu nan dihlak in. Tulio chan ahhin, Laimi lak lebang cun thil ti kho cem khi zumh awk a tlak lo bikmi an si lio, chan kan phan. Nain, cu pawl ko tawmuai khawh izuam chan a si ve hoi.
Israel pawl zong khi (Baibal chungah khin) Pathian hmai chimlo minung hmai hmanh ah zumhtlaklo lawngte in an rak inawicawt tuk lawmmam ve hna.
Cu tluk i zumhtlak a si lo, a ding lo kan si bu ah Amah a biatu minung vialte caah cun kan Pathian cu zumh tlak a rak si zungzal. Nihin ni tiang in zumhtlak Pathian a si.
Than Shwe chan liote khan, Kawlram pumpi chung i topography, le khua vialte umtuning map khi an rak suai. Finland le ramṭhangcho kip mifim phu dirhmi nih an rak suaipiak hna.
Google i HKA na hmuh hlanpi khan annih nihcun cu map chungah cun an rak ingeih dih cang. Mah cucu, keimah ka mit bak nih ka rak hmuhmi a si. A kong tu cu ka chim lai lo. Lainu pasal pa kha an thiamsang a rak si i ka rak hmuh bal ve.
TT hrawnghrang khuazei zawn, khika zawn, CV hrawnghrang a zei zawn khika zawn tbk khi satellite map lawngin si lo, a dikdiar detail ngai in an khumhpiak dih hna.
A sullam cu na umnak zawn (na innhmun) khi “cu latitude le cu longtitude” degree cuzat ah a um ti an theih ko hnu ah chanthar “precision” thiamnak he an fonh ahcun palh khawh si lo.
TT palik sakhan kha kan naule pawl nih laa ciammam hna kaw, ka daak lei cun langak cii lawngte a cak cem cu kan si ve fam, Kawlram pumpi theihmi ah ai cang colh. Zeidah ra lai, thinphaang ziar ko. Nan si cio ko khah.
Tlangpi a va phomh le a va nganh pet. Pathian a ṭhat khawh ning hi ka ti. A dik tak le tak lo cu ka thei lo nain, nihin ni tiangah raapsachia pawl nih TT khuapi cu voi 100 paoh cu bomb in a thlak hnawh cang ti in FB cahmai ka hmuhning cu si.
Minung nunnak pakhat hmanh a laa kho hna lo le pakpalawng lawngte heh maw tiah ai phomh seek, ti van theih tikah, Pathian zumhtlak a sinak a lang hrimhrim ti khawh a si. Nanmah thil ti khawhnak ah maw iruat lai uci. Zumhtlak nan si lo tuk bu ah kan Pathian cu zumhtlak a rak si hrimhrim.
Kachin le Karen ah cun siseh law, cei lak an tuar cang lai. Ka neek hna si lo. Thil sining a rak umtuning pawl ka von cuanh bia a si. Nain, nan sopaw hlah u. Luarpar kai zong herh lo. A biapi cem cu, a dik lo propaganda hrimhrim thlah hlah u.
Zeicahtiah cun, Laimi (Chin) hna hi cu kan milu a tlawm lawng si lo, miphunpi dang pawl hriktida thah khawh awktlak miphun kan si rih lo. Bawipa nih a kan kilven rih. Nain… ti in na tuak thiam a hau.
A ngai tiah cun, tutan i Laimi nih dohthlennak nan von ibiatak phunphai hi mah le mah izuam cawhnak lungput, porhlawtnak le ruamkai deuhnak in ai thawk ko khah. Ka chim lai lo nain, nan ihngalh ko.
Pathian dawtnak tu hi kan cungah zungzal a hmunh khawh nakhnga kan miphun nih rul bantuk in fimnak kan ngeih cu a herh ve cang ko. Noval le Sui Cung chan bang, “Na ngamh maw chuak! Icheih usih” ti chan si loh. Salai A Alexander