Kawfi (Coffee) cu TT ah an rak ciin bal ve. Nain, zei an rak hluhchuah ti tu cu ka hngal ve lo. Kawfi kung khi zohkhenh hau ngaimi an si rua. Lailei ah cun a zohkhenh le a domhtlaih lei ah kan chambau.
Zei coffee dah thaw bik? Chan thar mino nihcun Starbucks an ti bak lai. A dur phun in an zuarmi lakah kei cu Nescafe khi ka rak uar ngai bal.
Nain, kawfi ka din balmi lakah cun, Kuria tedawng sermi “pari baaket” (paris baguette) nih ka dii a ka riamh cem. A dur le a bawm in an chuahmi bel si lo. A dawr in (franchised chain) in an ram hmun kip ah an tuahmi dawr ta a si.
Starbuck cu a man faak nain, a rim ka rem lo. Paris Baguette he ai lo bakmi Singapore ta a um ve, MMPlaza ah ka rak din bal i ka uar dom.
Nain, cu kan ca i man faak kan timi pawl khi Kawfi man faak cem an rak si hna lo, ti si.
Vawleicung i kawfi man fak cem ah mi zapi ruahmi cu ram chizawh eek in a chuakmi kawfi mu khi thaw bik an ti.
A Kawfi min ah Kopi Luwak ti a si. Indonesia ram Java, Bali le Sumatra tikulh tepawl ah biatak tein phaisa tampi hmuh khawhnak business in an chuah.
Ram chizawh civet an timi pawl nih kawfi khi an ei. A sa a sennak le a hang lawng an eimi cu si i a mu khi an khai lo, an dolh chih.
Cu chizawh pawpi nih kawfi mu cu an rial kho lo, amah mu ning khin a eek.
Kawfi thei cu a sa in sermi si loin a mu khi a phunphun in uut lakin an reu an reu i cip lak phomh hnu ah a haang he dinmi si mu.
Civet ram chizawh pawpi chung a lut bal cangmi kawfi mu thawtnam cu a naang ai dang i a hmui deuh ti khi si. Cucu an uar tuk.
Cu ramlak cizawh eek in a chuakmi kawfi man cu 1kg ah $ 1300 bak a si. Indonesia ah thianghlim tein an tuah hna i business mangtara ah an iser hna.
Cun tah. Vawleicung kawfi man faak cem cu The Black Ivory a si, ti si. Sai eek in a chuakmi kawfi.
Sai (vui) eek chuak kawfi cu Thailand nih an tuah. Cu Sai-ek kawfi phun cu hotel sang bak timi five stars tehna deuh lawngah an zuar, ti si.A man bel 1 kg ah $ 2,500 bakte a si, an ti. Salai C Alexander