US Thawngpang. Maine Ramkulh, Lewiston Ah Meithal Kahnak In A Tlawmbik 22 An Thi, Hliamtuar An Tam. Tuzanlei ah US ram Maine ramkulh Lewiston khua ah meithal kahnak a chuak i a tlawmbik 22 an thi i 50/60 hrawng hliam an tuar tiah Maine State palik nih an thanh.
Meithal kaptu hi an tlai kho rih lo. Hi kongkau an hlathlai chung cu cuka hrawng i dawr vialte khar chung rih dingin Androscoggin County Sheriff’s Office nih an Facebook cahmai ah an thanh.
Maine State palik zong nih cuka hrawng a um mi hna cu inn chung ah um dih ding, innka hrenh dih ding le lunghrinh mi pakhat khat hmuh ahcun 911 auh colh dingin an theihter hna.
The Sun Journal newspaper nih a ṭial ning ah cun kahnak hi hmun thum, Mollison Way and Schemengees Bar & Grille Restaurant, Walmart Distribution Center le Sparetime Recreation ah a cang mi a si.
A thi mi le hliam a tuar mi hna hi mizeidah an si ti fiangin theihhngalh an si rih lo. Meithal kaptu zong ṭuanvo ngeitu palik nih hlathlai le kawl cuahmah lio a si. The Chin Post